Di Meja Makan

Dari meja makan
mama pangel par makan
samua su dudu malingkar di sana
bapa lipa tangan, lalu mulai angka doa-doa par tete manis
samua mata tatutup lalu dengar bapa pung sombayang

Mari suda katong mulai makan!
 
Di meja makan mama su siap makanan
cuman ada patatas deng kasbi rabus
pisang santang
papeda panas-panas
daong papaya
deng colo-colo ikan bobara

Bapa ambel piring lalu mulai kasi nasehat
mama timba kua ikan lalu mulai bale papeda
katong samua dudu diam dengar bapa pung nasehat

Di meja makan
makanan memang seng mewah-mewah
bapa pung nasehat biking makanan yang sederhana
akang rasa paleng nikmat
bapa slalu pesan
par ana-ana, ingatang sekolah bae-bae
lalu jadi orang bae-bae
biar bapa mancari kurang-kurang
asal kamong nanti  bisa jadi orang

Katong jarang makan nasi
tiap hari tongka deng kasbi
tapi bukan berarti katong seng bisa berprestasi
biar cuman makan patatas
tapi katong tetap optimis eso lusa
tuhan angka katong derajat di atas

Katong memang dari keluarga miskin
seng pung apa-apa
tapi seng usah insecure
harus perbanyak bersyukur
lalu sekolah bae-bae
kuliah bae-bae
la jadi sarjana
angka orang tua-tua pung muka
jika hari ini ada orang yang hina keluarga
biar suda, diam lalu buktikan
kalo katong jua bisa
biarkan nanti waktu  yang menentukan

Rumah Tiga, 08 Ferbuari 2021