Ramalan Mak Lorén

Nang akhir tahun 2009 mulai jam setengah sepuluh mbengi ANTV ngundang wawancara tukang ramal Mak Lorén. Ma’é Lorén omong nék tahun 2010 sing shio-né kuwi shio Macan Logam (dudu Gurita Logam, lho ndés) tahun sing kemot-kemot, adem-panas lan kerep ono kejutan-kejutan. Alam isih sok nesu, gempa isih sok jedal-jedul. Kuwi miturut Mak Lorén.

Mak Lorén yo omong bab politik. Ora nunjuk kedadéan nang negoro endi, Ma’é Lorén ngramal nék tahun 2010 iki arep ono presiden sing mundur opo dimundurké. Sepisan manéh, iki ramalané Ma’é Lorén nang ANTV tanggal 31 Desember 2009 mbengi. Bener opo ora iki? Yo mbuh, digagas ora marahi sugih, ora di gagas yo ora marahi kadasan-panunen. Opo terus kejang-kejang karo mancal-mancal. Netral-netral waé.

Pancén politik iki ora mung bab Presiden, ning yo perlu diéling-éling nék jaman Reformasi saiki ki, GBHN (Garis-garis Besar Haluan Negara) kuwi wis ora ono. Terus gantiné opo? Yo jan-jané nang praktek kenegaraan sehari-hari GBHN kuwi dadi nang tangané Presiden kepilih. Dadi pancén politik kuwi ora mung masalah Presiden, ning mergo GBHN nang tangané Presiden, Presiden nang jaman Reformasi tetep penting, tetep salah sijiné pusat nang jagat politik Indonesia.

Cedhak-cedhak akhir tahun 2009 salah sijiné stasiun TV mberitaké nék nang Polewari Mandar Sulawesi Barat ono Nikah Massal sing mergo seko akéhé peserta Nikah Massal kuwi terus mlebu rekor MURI. Peserta nikah massal iki akéh-akéhé yo rakyat cilik sing rata-rata nggo mbayar biaya nikah Rp 300.000 waé abot rasané. Ning bareng karo berita iki diberitakké nék poro Menteri lan pejabat negara oleh dum-dum-an mobil dinas anyar Toyota Crown sing regané siji Rp 1.300.000.000 (Rp 1,3 milyar) per mobil. Nék Presiden pancén netepké ora, ora usah tuku mobil anyar sing regané di atas sak milyar kuwi, yo ora bakal dhuwité rakyat di-céh-céh nggo gaya-né menteri-menteri kuwi. Ning kan nyatané mobil mewah kuwi dituku pemerintah, sido dituku meski ora karo delak-delok kiwo-tengen nék rakyat ki akéh sing isih urip rekoso. Wis payah tenan ki...

Coba bandingké karo negara Malaysia, poro Menteri oleh jatah mobil dinas merk lokal gawéané dhéwé, Proton sing regané ora ngati 300 juta rupiah. Nang negoro Belanda jatah mobil dinas Menteri ora ono separoné seko regané mobil dinas sing Rp 1,3 milyar iki.

Nang dhuwur kuwi conto cilik bab GBHN sing saiki wis nang tangané Presiden. Lha terus opo hubungané karo ramalané Mak Lorén? Yo tetep ora onohubungané. Nék awaké dhéwé Lik-wan, mletik lan wani, ora usah digagas ramalan-ramalan kuwi, termasuk ramalané Ma’é Lorén. Bab ramalan nék tahun 2010 kuwi bakal ono presiden sing mundur opo dimundurké ora usah digagas nganti pecas ndahé. Dudu presiden sing kudu dilawan rakyat kuwi, ning sing dilawan yoiku: sing marahi mlarat, sing marahi geblek, sing marahi urip bareng sebagai satu bangsa kok ora adil iki. Kuwi sing kudu dilawan …

Lha sopo to sing marahi rakyat kok akéh sing tetep mlarat, kang Marhaen akéh sing tetep mlarat iki?

Crito bab kasus Bank Century, crito bab kasus KPK (Komisi Pemberantasan Korupsi) vs Polri plus soal sekitar Anggodo-Anggoro, soal Artalyta Suryani (Makelar Kasus sing kecekel) plus crito soal Syamsul Nursalim (sing ngemplang BLBI triliunan rupiah – saiki urip ayem tentrem nang Singapura) kuwi nunjuk soal isih kuaté opo sing disebut oligarki lan pemburu rente nang Indonesia.

Oligarki utowo komplotan (kekuasaan) utowo sing disebut karo George Junus Aditjondro: gurita saiki jaman reformasi iki tambah kenceng waé, tambah kelét kong-ka-li-kong-é karo sing disebut pemburu rente. Pemburu rente kuwi wong usaha sing nyedhak-nyedhak karo kekuasaan, ngatur-atur kebijakan lan peraturan kanggo kepentingané dé’é dhéwé.

Nah komplotan oligarki-pemburu rente iki sing marahi rakyat akéh tetep mlarat, rakyat akéh tetep oleh perlakuan ora adil lan rakyat akéh tetep ora tambah pinter. Sayang seribu kali sayang tekan sepuluh tahun bar reformasi iki mlaku, komplotan oligarki-pemburu rente iki malah tambah ndadi, tambah kenceng, tambah duwé kekuatan ngotar-ngatur negara. Kekayaan alam Indonesia kuwi dikangkangi karo komplotan oligarki-pemburu rente. Diuntal mung kanggo weteng-wetengé dhéwé, rakyat mung diképréti BLT waé. Dadi, sepisan manéh, iki sing kudu dilawan…. MasalahéPresiden yo iso waé mung dadi anthéké komplotan oligarki-pemburu rente kuwi. Buktiné: bar Pak Harto léngsér, komplotan oligarki-pemburu rente plus koruptor tetep berkuasa ki. Gonta-ganti presiden, nganti tekan presiden Yudhoyono saiki ki sing jenengé Anggoro lan sing kakap Syamsul Nursalim, pengemplang BLBI triliunan rupiah isih ongkang-ongkang urip penak nang Singapura, malah Indonesia diobok-obok gégar-gégér waé nganti ono tarung cecak vs boyo barang. Mbah Minah sing njupuk 3 biji kakao (coklat) waé cepet banget terus disidang lan divonis, lha sing ngemplang milyardan nganti triliunan rupiah kok masih senyum-senyum saja.

Pancén yo ono beneré nék ono sing omong pelaksanaan hukum nang Indonesia iki, nganti tekan jamané presiden Yudhoyono saiki ki, hukum koyo jaring-jaring laba-laba. Jaring-jaring laba-laba kuwi mung iso nyekel semut, lemut-nyamuk-jingklong, gedhé-gedhéné laler ijo, ning kanggoné boyo lan gurita sing cluthak-nggragas, jaring-jaring laba-laba kuwi tidak berdaya, ditabrak waé wis pedhot-ambyar. Piyé jal iki, reformasi kok dadi ngéné ki piyé ndés. Bola-bali pemilu kok ketemuné Artalyta, Anggodo, Ong Yuliana lan sak jenisé poro makelar kasus kaé plus komplotan oligarki-pemburu rente..., wis jan ciloko tenan iki awaké dhéwé wong-wong cilik iki

Mbah Surip swargi wis ngélingké supoyo rakyat tangi nganggo lagu sing nyemoni awaké dhéwé:

Bangun tidur ... tidur lagi

Banguuuun ....tidur lagi ....! *** LikWan, No 29 Th. II Januari 2010

LikWan adalah Koran Cilik Bahasa Jawa

Suplemen Buletin PRAKSIS

Terbit setiap minggu sekali, gratis