Bakul Purun Kai Adul
Kai Adul, tukang cari palilak di tangah sawah. Limbah subuh sudah am bukah. Parahu bocor kada tetambal, penanjak paring jabuk sebalah.
Kai Adul panuhanya di kampung subalah. Mulai bahari rajin ibadah. Sembahyang subuh pasti di tangah. Kada tahu hujan atawa bakah.
Menyorangan gubuk di pahumaan. Seharian menunggui banyu lawang. Bila banjir melabang terpal. Bekunyung melarut banyu habang.
Sayur palilak meular-ular. Dijarang lawan anakan sapat. Uyah lawan asam campuran masak. Habis nasi sepiring hibak.
Kai Adul, rancak menangis. Umur panjang kaya gerimis. Hilang datang kada betampis. Kadada orang handak melapis.
Bakul purun sidin kada suah kosong. Isinya macam-macam makanan. Bila tetamu kekanakan, pasti perajakian. Dapat hadiah lawan pasti kanyang.
Bakul purun membawa berkah. Siang kosong sore baisi. Mahurup palilak jadi makanan kada gasan sidin sorangan.
Kai Adul lambang tradisi orang bahari. Hidup sederhana kada banyak pintaan. Kada pernah mengeluh lawan tetangga. Apalagi behutang-hutang. Sidin rajin usaha. Biar palilak kada larang dijual. Kai Adul kada pernah behual. Ditawar berapa haja kada pernah memalar. Bariakan bila ada nang minta.
