Waka Kurikulum MTs Al-Hadi II Ndherek Pembekalan Penerjunan PPL Universitas Alma Atta

Bantul (4/10)-Waka Kurikulum MTs Al-Hadi II, Duwi Sri Lestari, M.Pd. ndherek pembekalan penerjunan mahasiswa PPL wonten ing Universitas Alma Atta. Kegiyatan menika kalampahan ing dinten Rebo (2/10) ingkang dipunpandegani dening Dekan FITK Universitas Alma Atta, Dr. Ahmad Salim, S.Pd., M.Pd. kanthi pasarta pembekalan gunggungipun 24 sekolah utawi madrasah ing laladan Bantul lan ugi kitha Yogyakarta. Ing adicara menika Dr. Ahmad Salim mratelakaken bilih kegiyatan PPL menika dipunajab saged ndadosaken para mahasiswa FITK saged dados guru ingkang profesional boten namung ahli wonten teori ananging ugi wonten ing praktik pasinaon.

"Ancas saking kegiyatan PPL menika samangke para mahasiswa FITK saged dados guru ingkang profesional ingkang boten namung wasis babagan teori ananging ugi saged prigel nggenipun mucal ing sekolah utawi madrasah, " ngendikanipun Salim.

Wonten ing kegiyatan PPL samangke saben sekolah menengah pikantuk 7-8 mahasiswa saking jurusan Pendidikan Agama Islam lan saking mahasiswa jurusan Pendidikan Matematika. Dr. (Cand) Hairiyah, S.Pd.I., M.S.I minangka panitia mahasiswa PPL ugi mratelakaken bilih kegiyatan PPL menika ing antawisipun praktik pasinaon utawi pembelajaran lan praktik persekolahan.

"Samangke kegiyatan PPL ingkang badhe kalampahan menika praktik pembelajaran lan praktik persekolahan. Praktik pembelajaran menika wiwit saking persiapan mengajar dumugi ing praktik ngajar wonten ing kelas. Dene praktik persekolahan samangke saged ing administrasi tata usaha, laboratoritum, perpustakaan, lsp. Kangge praktik ngajar ing kelas, samangke saben mahasiswa paling sekedhik 5 pertemuan sadangunipun PPL," ngendikanipun Hairiyah.

Kegiyatan PPL menika badhe dipunlaksanakaken wiwit tanggal 8 Oktober 2024 kangge penerjunan lan dipuntarik tanggal 15 November 2024. Waka Kurikulum MTs Al-Hadi II kapiji minangka guru koordinator ingkang samangke badhe dipunparingi jejibahan mandhegani kegiyatan PPL mahasiswa Universitas Alma Atta ing MTs Al-Hadi II. (DSL)