MTs Al-Hadi II Pikantuk Omah Sampah Saking BAZNAS Bantul

Bantul (1/10)-Madrasah Tsanawiyyah Al-Hadi II ingkang mapan wonten ing Mejing, Bangunjiwo, Kasihan, Bantul dinten Kemis (26/9) pikantuk bantuan arupi papan kangge mbucal botol utawi gelas plastik ingkang dipunsebat Omah Botol. Bantuan menika dipunaturaken pihak BAZNAS langsung dhateng Bapak Alfan Aliyafi minangka wakil saking Yayasan Al-Hadi Yogyakarta. Piyambakipun ngandharaken bilih bantuan menika minangka cara kangge nglestantunaken lingkungan kanthi ngempalaken botol lan gelas plastik ingkang samangke badhe dipunolah malih supados dados piranti ingkang migunani. 

"Bantuan Omah Botol menika salah satunggaling langkah supados kita saged ngolah sampah plastik ing lingkungan madrasah menika kanthi cara dipunkempalaken langkung rumiyin", ngendikanipun Pak Alfan. 

Pranyatan menika ugi sami kaliyan ingkang dipunngendikaken dening Ibu Syah Fathi Azzatia minangka kepala MTs Al-Hadi II bilih kanthi wontenipun Omah Botol menika dipunajab ing tembe para siswa saged mbedakaken sampah ingkang organik saha sampah anorganik. 

"Kanthi wontenipun Omah Botol menika, dipunajab samangke para siswa saged milah sampah ingkang organik lan ingkang anorganik. Ingkang anorganik kadosdene botol lan gelas plastik saking air mineral saged dipunolah malih dados barang ingkang dipunginakaken malih. Langkah menika ugi saged ngirangi sampah ing lingkungan madrasah mriki", ngendikanipun Bu Azzatia.

Siswa MTs Al-Hadi II pikantuk edukasi pilah sampah saking BAZNAS Bantul (dok. pribadi MTs Al-Hadi II)

Pihak BAZNAS Bantul, Laela ugi mratelakaken bilih bantuan menika salah satunggaling wujud program saking divisi Promkes Klinik Rumah Sehat BAZNAS Bantul ingkang menyalurkan tempat sampah khusus botol utawi Omah Botol kangge masarakat. Program menika nggadhahi ancas supados para masarakat saged sadhar lan preduli dhateng lingkungan kanthi cara milah sampah ingkang saged dipungunakaken malih kados ta botol plastik. 

"Penyaluran Omah Botol menika salah satunggaling wujud saking program  divisi Promkes Klinik Rumah Sehat BAZNAS Bantul ingkang menyalurkan tempat sampah khusus botol utawi Omah Botol kangge masarakat. Program menika gadhah ancas supados botol plastik ingkang sampun boten dipunginakaken saged dipunolah malih supados boten dados sampah ing tengahing masarakat. Penyaluran Omah Botol menika ugi dipunsarengi kaliyan edukasi pilah sampah ing para siswa", ngendikanipun Laela. 

Kejawi penyaluran Omah Botol, pihak BAZNAS ugi ngawontenaken kegiyatan edukasi pilah sampah dhateng para siswa MTs Al-Hadi II. Edukasi menika nggadhahi pangajab supados samangke para siswa saged mangertos kadospundi milah utawi milih sampah ingkang saged dipungunakaken malih (sampah anorganik). (DSL)