Pempek Palembang Lemak Nian

• Kehadiran Kompal di acaro ICD tanggal 13 Mei 2017 di Jogja  lalu bukannyo basing bae. Banyak yang nak diambokke ke uwong. Misalnyo, Kompal  yang punyo kegiatan seabrek itu, yang uwong-uwongnyo bukanlah Blogger murni, melainkan uwong yang punyo aktivitas rutin sehari-harinyo itu, tetap mampu berinteraksi di dunio maya dengan karyo nyato.
• Contohnyo be, Dokter Posma, itu saban hari nyontek uwong di pantat kiri kanan, tapi dio maseh biso nulis kelakuan dio sehari-hari waktu ngadepin pasien dan obat apo yang diresepkenyo. Walaupun punyo agenda dinas yang banyak dio jugo buktike bahwo agenda Kompal yang terkait dengan Kompasiana maseh diijokenyo untuk datang.
• Terus Bu Elly, yang sebagai uwong senior di Dispenda Plembang, cengkilah segalo gawe di kantor terapiliasi dengan dio, tapi dio juga maseh sempat nulis dan selalu sigat ngurusi kegiatan Kompal dimano bae berado.
• Ado pulo, Mbak Etha. Yang sudah bermukim kembali di Jakarta, tapi tetep jadi uwong Kompal. Kami ngelarangnyo keluar, kareno dio lah kami anggap pecak dolor dewek, keluargo dewek. Memang mak itulah uwong Plembang, kalu lah baek samo uwong, nyawo be dienjukkenyo, apolagi Cuma sekedar nak bedolor, itulah gawean sari-sari.
• Nah, yang terakhir hadir kemaren tu, Mangdu alias Omdu, alias penulis dewek. Meskipun jauh di Tapanuli Selatan, karena lahir dan besak di Plembang, terus keluargonyo jugo di Plembang, yo jadilah dio anggota Kompal jugo. Men yang ini, dak usahlah nak diceritoke nian, kesibukkannyo sehari-hari luar biaso, kerjo dari jam 7.30 pagi sampe tengah malam lah gawe sari-sari. Tapi maseh bae sempet-sempetnyo nulis, malah jadi buku pulok tulisannyo. Samo jugo dengan Dokter Posma, kalu ado gawean Kompal masih makso-makso nak datang.
• Nah, tujuan makso nak datang uwong-uwong Kompal itu cengkilah sikok, pengen bebaur dengan uwong banyak. Pengen ngompol rame-rame, makmano nian caro hidup blogger tu, maklumlah bukan blogger murni. Jadi tersebutlah kisohnyo,  kareno ado tawaran untuk berangkat samo-samo dari  Jakarta dan nginap samo-samo di Jogjakarta, belanjakanlah kami setujui. Tebayanglah bakal nak rame di perjalanan, nak tedok bareng bekaparan di lantai. Pastilah ladas.
• Tapi apo hendak dikato, kareno bukan blogger murni tadi, yo jadinyo ado bae gawean kantor yang mendadak, akhirnyo aku dak pacaklah pegi samo-samo dari Jakarta, jadi kareno maseh pengen ngumpul tadi, nyari pesawat langsung ke Jogjakarta via Medan. Dapat khabar rumah yang disewo tu pake kamar dan kamarnyo lah abis, dak jadi tedok bekaparan di lantai. Jadilah aku ngubungi kawan minta cariken hotel, untunglah dapatlah Cavinton Hotel. Dem, nyamanlah. Tek masalah lagi soal tedok.
• Nah, ngapo laju mak ini cerito? Pecak diatur nian nulisnyo. Padohal yang nak diceritoke tadi adolah tentang Pempek Kompal Yang Lemak Nian ini.
• Pempek Kompal itu dibuat oleh suhunyo, masternyo, yang merupakan admin Kompal, kebanggaan Kompal, yang profesinyo selain sebagai Pengacara, jugo ngurusi anak samo laki. Nah, tiap kegiatan Kompal yang inilah jadi Chefnyo. Diolah yang bikin Pempek Kompal. Kami biaso manggilnyo Bik Cik Tika, alias Kartika Kariyono.
• Sudah dibuatnyo lebih kurang sepuluh kilo, dikirimlah pempek itu ke Jogja, sampe di Jogja pas hari Sabtu tanggal 13 Mei itulah. Langsung bae, Omdu yang sudah datang jam sepuluh pagi pegi ke penggorengan tempat bibik-bibik Jogja jualan Cilok untuk numpang goreng. Uwongnyo  baek nian. Dilayaninyo galo. Nak lamo dan sebentar ngoreng di situ lajulah katonyo. Dio tahan ngurungke uwong nak meli.
• Yang ngelayani mandu ngoreng tu Kak Reth alias Maria Margaretha samo Shanti kawannyo ngajar. Nah, tebayangkan uwong Kompal itu, meski yang hadir di situ Cuma uwong empat, tapi lengkap etnisnyo, ado Mangdu yang berasal dari Muaraenim kampungnyo Munarman FPI itu, tapi Mangdu blasterannyo jugo dengan Kayuagung, kareno umaknyo uwong sano. Ado  Mbak Elly yang uwong Komering, tapi hatinya lembut dan baek. Ado pulo Dokter Posma yang keturunan Batak, tapi tingkahnyo lah samo dengan uwong Plembang. Dan  tentunyo Kak Reth yang bermato sipit. Tapi kami akurrrr…. Dak pernah nak mbahas masalah itu. Katek dalam pikiran kami.
• Balek ke pempek tadi yo. Pempek itu ruponyo laris manis, liat be di photo-photonyo. Rugi nian kalu uwong yang datang ke ICD itu dak sempat nak makannyo apolagi sekedar nyicip be. Rugilah. Segalo uwong di sano yang lah temakan ngomongke lemak nian. Malah ado yang ngantongi nak bawak balek. Yo, kareno uwong Plembang tu jugo baek-baek kami enjukke bae. Bawaklah nah, kato kami. Jangan kepunahan. Dak sampe jam duo belas, pempek tu lah abis.
• Nah, kalu nak nanyo makmano caro bikinnyo, silahkan hubungi Kompal yo. Gek kito adoken demo masak pempek ke komunitas mano be yang nak ngundang. Dak usah mikirke biaya. Uwong Kompal tu baek-baek, dak perhitungan. biasonyo tekompol dewek biayanyo. Jadi, itulah ceritonyo tentang kehadiran Kompal di ICD, semoga menambah eksistensinyo Kompasiana di sejagat nusa.

Dedengkot Kompal, Dok Posma, Kak Reth, Mangdu, Umek Elly, dokumen pribadi

Penyerbu Pempek Kompal, Dokumen Pribadi

Pempek KompalLemakNian, Dokumen Pribadi