Emang Boleh Sebingung Ntu?

"Mang lu yakin nih, ame pilihan lu? Kaga mau lu robeh?"Tanya Enyak Mumun sama Udin anaknya. Udin melirik Nyak nya,lalu menjawab,"Kaga,Nyak!Udin yakin!Percaya dah ama Udin!"Sambil menarik nafas, Nyak Mumun berkata,"Hhmm, ya udeh! Biar kate enyak kurang sreg ame kemauan lu, tapi Enyak tetep doain!"Mendengar jawaban Enyak nya,Udin tersenyum dan berkata,"Naah, gitu dong ,Nyak! Doa Enyak kan mantab!Makasih ye,Nyak!" Lalu Udin mencium tangan Nyak Mumun.
 
***
"Mun, kayanye semalem si Udin nginep di mari? Tapi gue panggil dari tadi kaga nyaut! Emang die masih ngorok ape?" Tanya Babe Jamal ketika ngeliat Nyak Mumun dateng sambil bawain kopi sama sepiring singkong rebus."Iye, semalem die nginep tapi dari tadi die keluar!Katenye dIa lagi ade perlu ame Pak RT!" Jawab Nyak Mumun. Sambil nyeruput kopinya, Babe Jamal menanggapi jawaban Nyak Mumun,"Ape lu kate? Janjian ame RT? Tumben!"Kata Babe Jamal mengerutkan keningnya."Iye, aye kaga tau ade keperluan ape die ame RT!"Jawab Nyak Mumun. Tak lama kemudian,"Assalamualaikum!"Ternyata Udin datang. Kedua orangtua itu menjawab salam Udin bersamaan. Udin langsung masuk dan mencium tangan Babe dan Nyak nya. Saat Udin duduk, Babe Jamal langsung bertanya,"Dari mane,lu?Tumben pagi-pagi udah kelayaban ke rumeh RT? Babe kire, lu keluar lagi beli nasi uduknye Mpok Ab!" Sambil mengambil singkong, Udin menjawab,"Kaga,Be! Masa aye beli nasi uduk!" Mendengar jawaban Udin, Babe Jamal langsung berkatadengan sedikit sewot,"Dooo, sombong amat!Emang ngapa?Emangnye kalo artis kaga boleh beli nasi uduk?" Melihat gelagat yang kurang enak antara bapak dan anak, Nyak Mumun langsung nyamber,"Yaa,si Abang pegimane sih? Kan emang dari dulu yang beli nasi uduk bukan si Udin! Udeh deh bang, gak useh jadi lebar ke situ-situ!" Mendengar Nyak Mumun membela Udin, Babe Jamal menjawab dengan kesal,"Ngapa sih lu,Mun!Gue kan cume nanye! Sensi banget si lu! Belain dah tuh anak kesayangan lu!" Lalu Babe nyaplok singkong rebus yang masih anget."Udeh ah,ngape jadi pade berantem sih?"Kata Udin menengahi."Nih ye, Be, Aye jelasin, semalem kan aye telpon Pak RT, terus aye diminta dateng ke rumah Pak RT pagi-pagi.Eh pas aye ke situ, Pak RT malah kaga ade. Kate Bu RT udeh jalan ke kantor! Perasaan, aye dateng ke rumahnye tepat waktu, sesuai yang udah disepakatin dah!"Kata Udin kesal. Lalu Babe menjawab,"Biasee, kalo pejabat emang begitu. Biar keliatan sibuk, biar orang bilang die orang penting! Segitu baru tingkat RT, pegimane kalo tingkat lurah, tingkat camat!"Kata babe sambil mengangkat satu kakinya ke kursi. Kemudian Nyak Mumun ga mau ketinggalan, dia nasehatin Udin, "Tuh,Din! Kan elu pengen nyalonin diri lu jadi pejabat negare, tar lu kalo jadi pejabat, jangan begitu, ye! Lu harus ngelayanin rakyat! Bukan lu yang pengen dilayanin! Lu jangan  sibuk ame diri lu kendiri! Kalo rakyat punye keluhan jangan cume lu tampung ampe penuh tapi kaga ade solusinye!"Udin ngangguk-ngangguk. Babe Jamal menanggapi perkataan Nyak Mumun dengan santai tapi bikin Nyak Mumun kesel,"Sok tau lu,Mun! Kaya ngarti aje! Pake sok-sok an ngomongin politik!" Mendengar itu, Nyak Mumun agak tersinggung, dia langsung berdiri,"Yaelah, abang! Biar kate aye kaga ngarti politik, tapi aye kan ngerasain masalah yang ade di mari! Kite kan juga  ngerasain kalo semue harge kebutuhan pokok pade mahal! Nah abang, cume tau ngasih duit doang, tapi kaga tau tuh bini muter otak tiap ari biar tuh duit  cukup buat belanje sebulan! Mending kalo aye sediain  kecap ame ikan gesek, kaga protes! Nih ye bang, asal abang tau, harge beras mahal, eehh minyak juga mahal, terus cabe, bawang mahal! Jangan kate daging, ikan asin aje, mahal! Semue harge naek! Mending kalo naeknya dikit! Nah ini naek kaga kire-kire! Boro-boro bise beli sekinker biar muke kincolongan!" Udin memegang kepalanya mendengar Nyak Mumun ngeluh.Babe Jamal menggaruk kepalanya dan menjawab,"Yaelah.Mun, lu pake mau beli sekinker! Begitu aje elu udah cakep! Yeee, tapi bener juge sih yang lu omongin tadi,Mun! Abis mau pegimane? Abang kan cuma pegawe kelas rendahan. Biar kate tuh duit cekak, tapi kite kudu bersyukur!" Lalu Nyak Mumun menanggapi," Iye Bang, aye sih bersyukur!Tapi kan kalo kaga ade jalan keluar ame perhatian dari yang di sono, pegel juge nih ati! Kalo kite, Alhamdulillah, si Udin udah setengeh taon jadi artis! Lumayan, bise nambahin duit bulanan!" Mendengar itu, Udin nyengir. Lalu Udin mengambil singkong lagi. Sambil ngunyah tuh singkong, Udin berkata," Mangkenye Nyak,Be, doain Udin biar Udin lolos jadi Caleg.Tar kan Udin bisa nyampein tuh keluhan Enyak!" Mendengar itu, kedua orangtua Udin langsung melihat ke arah Udin. Babe Jamal memonyongkan mulutnya dan berkata,"Din,kalo nyampein aje sih, udeh banyak yang nyampein kali! Tapi kalo kaga digubris, percume! Eh, Din,  babe bingung dah, lu kan kaga ikut partai, lu aje kaga ngarti soal politik, lu cuman tamatan SMA! Kok lu bise-bisenye nekat mau jadi caleg?"Udin tertawa lalu menjawab,"Sekarang ape sih, Be,  yang kaga bise? Semue bise! Nah di jaman sekarang, ujan aje ade remotnye! Yang tadinye warna putih bisa jadi abu-abu! Nih ye, kenape sekarang banyak artis yang pengen jadi caleg?Soalnye,artis entu kan banyak penggemarnye, jadi gampang menangnye! Yang penting berani ngeluarin duit banyak buat kampaye! Urusan pegimane kerjanye, entu sih urusan belakangan! Asal babe tau nih, kate temen Udin, Udin kaga pape kalau kaga  ngarti yang bakalan Udin kerjain nanti, kaga pape Udin belom ngarti,Yang penting menang dulu, terus duit yang udeh Udin keluarin buat kampenye, bisa balik! Kan gaji caleg gede banget tuh,Be!Begitu,Be!"Beba Jamal menggaruk kepalanya lagi, lalu bertanya,"Trus kalo lu kaga kepilih, tuh duit yang udeh lu kluarin pegimane?" Udin langsung menjawab,"Yee ilang!" Lalu Nyak Mumun ikut nyamber,"Ape lu kate?Ilang? Berarti kalo lu kaleh, duit yang kemaren Enyak kasih  hasil ngejual kebon jengkol, ilang?" Udin menggaruk kepala sambil senyum ngeri lalu berkata,"Yeee, iye,Ilang! Mangkenye, doain Udin, biar menang!Kan kalo Udin menang, Udin bisa beliin Enyak kebon jengkol yang lebih luas!" Enyak Mumun berkata sambil narik nafas,"Ya Alloh,Din! Ngapa lu pengen jadi caleg sih?Mendingan lu jadi artis aje dah, duit kaga ilang, ati luh tenang kaga mikirin ape-ape, palingan yang lu pikirin cuman gosip dari orang yang kaga demen ame lu!Lagian kalo lu tetep maen sinetron, Lu masih tetep ngasih duit bulanan buat Enyak!"Mendengar Enyak Mumun, Babe Jamal juga ikut komentar," Iye,Din, kalo lu jadi caleg, tanggungjawab lu gede! Amanat dari rakyat, ga boleh lu sembarangin! Kalo lu kaga bisa jalanin, dose lu! Jangan maen-maen! Urusan lu di akherat!"Udin menggaruk kepalanya kemudian menjawab dengan agak kesal,"Kalo Nyak ame Babe begini , jadi suseh nih buat Udin menang! Percayain dong! Ikhlasin Udin,doain Udin biar Udin bisa menang di pemilihan nanti! Kan kalo menang,Udin bisa bantu ngomong ame yang lebih tinggi jabatannye tentang ape yang rakyat keluhin!!" Babe Jamal berdiri lalu menanggapi,"Udin, Babe cuma kesian ame lu, Lu bise punye niat begitu, tapi kalo pejabat yang lebih tinggi dari lu kaga nanggepin, percume! Yaa,kalo kate babe sih, lu batalin aje niat lu! Mendingan, lu kerje yang bener,lu cari duit yang banyak, lu bahagiain bini ame anak lu, bahagiain orangtue lu, abis entu tenang dah idup lu! Ketimbang lu ikut-ikutan politik! Iye gaji lu gede, tapi model kaya kite,kaga bakalan tenang idup lu! Lu inget kaga ame lagunye Iwan pales? politik itu kejam! Nah coba dah lu pikirin lagi! Mumpung tuh duit hasil penjualan kebon jengkol Nyak lu, belom lu bagi-bagiin buat orang! Duit abis, menang kaga! Kaga setres aje udah bagus! Udah dah,  sekarang babe mau mandi dulu!" Setelah nasehatin Udin, Babe Jamal masuk ke dalam rumah untuk mandi. Nyak Mumun juga berdiri kemudian berkata,"Kalo kate Enyak, omongan babe lu tadi bener banget! Mendingan kite idup ga useh terlalu ambisi! Kite idup cuman bentaran, kaya tapi kalo kaga berkah, kaga enak, bawaannye kurang aje!Nah karena kaga berkah, jadi dah lu korupsi!Aduhh, Enyak takut dah ngebayanginnye,Din! Mendingan kite idup biase-biase aje! Udah deh,Din, Enyak mau nyuci dulu, lu pikirin lagi dah tuh omongan Babe ama Enyak!" Nyak Mumun jalan ke dalam. Udin diam karena bingung. Niat pengen banget jadi caleg tapi orangtuanya udah ngomong begitu. Hatinya jadi ragu. Udin menggaruk kepalanya yang ga gatel, lalu bicara sendiri"Emang kudu nurut ye ama orangtua biar selamet!" Setelah itu Udin ikut masuk ke dalam rumah.

                                                     ________________
                                                             Diana Husna, S.Pd.
                                                    _________________