Ade Pameo (Peribasa nyang dijadiin semboyan) bilang kalo JAKARTA ntu singkatan dari "JAlan KARet Tanah Abang".
Kate siape Cang???
Gue dapet ntu info pas gue iseng baca-baca di banyak sumber Tong... mangkanye loe jangan ngedekem di pasar Tenabang mulu! Sekali-kali jalan-jalan kemana kek kayak gue nih. Pan nyang ngasih nama Jakarta ntu Proklamator bangsa kite Bung Karno. Nah ntu Pameo gue dikasih tau ame nyang dapet info dari anak perempuannye Bung Karno ndiri yaitu Bu Mega dan Ade Iparnya, Pak S. Kiemas. Paham Loe Tong sekarang?
Kalo sampe name Jakarta di ambil dari singkatan Jalan Karet Tanah Abang, berarti emang Pak Jokowi dan Koh Ahok nyadar bener dari situ ntu Jakarta kudu mulai dibenahin. Dan ternyata emang bener kan sampe-sampe, begitu Pak Jokowi ame Koh Ahok pengen ngerapiin ntu tukang dagang nyang pade ngelambak ampe ke jalanan dan ngenganggu lalu-lintas dan orang nyang pade jalan kaki, dan khususnye koh Ahok mendapatkan perlawanan.
Perlawanan dari siape Cang?
Nah loe beneran dablek ye loe Tong, mangkanye ntu tipi dirumah enyak loe loe nyalain! jangan loe jadiin pajangan doank. Pan kemarenan di tipi ame di koran pade rame nyang ngedemo dan mrotes kebijakan Pak Jokowi ame Koh Ahok buat ngerapiin ntu tukang dagang, terutame Koh Ahok nyang didemo segala pake jurus mao ngejait mulut. Nah gue bingung ntu tukang demo ape tukang jait ye nyang pada demo?
Gue denger-denger sih ntu nyang demo pejabat anggota Dewan nyang gue tau sii dulunya ntu orang gede dan idup di Tenabang! Tapi gue lupa Tong namanye sape. Tapi kalo ngeliat mukanya mah gue inget ntu sape. Nah Loe Tong kalo pade mao tau ntu anggota Dewan sape, datengin atawa loe tanye aje ame Bang Hercules nyang pernah juga sempet nguasain Tenabang. Puas deh loe Tong kalo dapet jawaban dari Hercules mah. Intinya sih biar kata gue tau ntu anggota Dewan dulunye gimana. Gue mendingan diem aje. Gue tau bener tuh watak die waktu mudenye.
Pesen gue buat Koh Ahok. Kagak usah takut koh, ntu orang mah cuma ngegertak doank ditambahin kuatir asep didapurnye jadi kurang ngebul! Ane salut bener dah pokoknye ame ente Koh Ahok.
Gue denger juga katanye sih udeh pada akur tuh koh Ahok ame ntu anggota Dewan dan ntu tukang-tukang dagang udeh pade mao dipindahin ke blok G tenabang. Ya mao lah sape nyang kagak mao, pan gratis 6 bulan kata koh Ahok. Benernye sih bukan alasan gratis, pan mereka juga nyadar kalo dagangan mereka ngeganggu jalanan, cuma selama ini mereka bingung mesti dagang di mane di ntu pasar.
Ya udeh kalo udah pade salaman mah.
Baru aje nafas dikit legaan eh sekarang ade lagi ntu ape lagi tuh nyang katenye Asosiasi PKL Indonesia nyang mau nyiapin ratusan pengacara buat nuntut koh Ahok karena dinilai koh Ahok udah mengintimidasi ntu tukang-tukang dagang. Jiailah Cing Cang Cung dah loe sekalian. Tukang dagang mane nyang merasa di intimidasi ame koh Ahok? pan udeh ade beritanye kalo ntu tukang-tukang dagang pada mao dipindain ke blok G. Coba ente nyang namanye asosiasi berasosiasi dulu nyang bener atuh lah.
