Barusan di sebelah, Kong Arke nulis tentang angpau pemberian caleg. Biase.., kalo udah deket pemilu gene, pan biasenye banyak orang-orang nyang mendadak baek hati, peduli, suke ngasih ini entu, bagi-bagi duitlah. Sambil tebar pesona, ame ngopros janji-janji gombal. Ujung-ujungnye, apalagee kalo bukan minta dipilih. Padahal, kalo ntar udah kepilih, semue pade lupe ame janji-janjinye. lupe melayani rakyat, nyang inget cuman gimanee getho.. supaye cepet kaye, mumpung masih punye korsi. Dasar siluman korsi ente pade! Gue sumfahin ente nyungsep di got kali sebelah!
Tapi, herannye, ane seumur-umur kagak pernah kebagean entu angpao seperakpun. Molai zamannye engkong Soeharto ampe zamannye encang Sebeye, udah berape kali pemilu, kagak ade juge nyang mau nyamperin rumah ane buat ngasih entu angpao. Molai pileg,pilpres ampe pilkades, kagak ade tokoh atawa te es nye nyang berani salamelekum. Ane jadi heran bener, koq tega-teganye entu caleg, bisa-bisanye begitu banget sama ane? Walahadlah.., mungkin udah nasib ane, kagak pernah makan duit sogokan dari para caleg atawa calon penguase lainnye.
Padahal, ane udah mikir, kalo ade caleg nyang ngasih duit, ane mau beliin kemenyan dua kilo. Ane mau bakar entu kemenyan malem Selasa Kliwon. Ane suruh jin-jin penguase pohon beringin di deket kubangan lumpur, supaye bikin ntu caleg anyang-anyangan tujuh Jumat. Biar pade nyahok ntu caleg. Enak aje praktekin jual beli suare. Mau jadi pemimpin aje pake acara nyogok rakyat. Ntar kalo udah duduk, pade korupsi lagee. Ditangkap KPK malah senyam-senyum, pasang muke kagak berdose. Sok culun, lebay banget ente.
Ane lempar telur busuk ente! Prook.., rasain, muke gile ..!
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
