Pada suatu ketika, Udin Kadut dah mikir mau kawin. Tapi, mau ngomong rada tengsin.
"Beh, kalau golok mesti ada sarungye yeh?" kata Udin Kadut tiba-tiba.
"Lha iya. emang ngapah....?" jawab babenya nggak ngerti. Soalnya, omongannya si Udin gak danta. Sejak zaman Nabi Adam sampai Adam Jordan orang udah pada mafhum kalo golok ya, ada sarungnya.
"Kagak..." abis jawab dia langsung ngeloyor pegih. Ninggalin babehnya yang melongo.
Hari Kedua, mendadak pas baru pulang jualan sayuran di pasar Bekasi, Udin ngomong lagi, "Beh, kalau ayam nyredeng-nyeredeng itu kenapa?"
"Ah, elo kayak bocah segitu aza gak tahu. Itu tandanya mau kawin die...." tukas sang babeh sengit.
"Oh, mau kawin ye...." lagi, abis jawab die langsung melangkah ke kamar.
Dasar si babe, dia teteup kagak mudeng. Untunglah, ade nyak Saroh, enyaknya Udin kadut.
"bang, nape ye si Udin nanya yang aneh2. Kemarin nanya golok ama sarungnye, karang nanya ayam nyeredeng....." katanya bari benerin kudungan.
"ya, gue kagak tahu. Tanya dah kendiri ama tuh bocah..."
"Diiin....." tereak sang babe.
"baeee...." jawab Udin dari dalam kamar.
"sini...."
"ngapa seh beh?'"
"emangnye lo udah punya dedemenan?"
"Ah, jadi gituan ditanya..." Udin tersipu malu. Bibirnya nyengir kuda. Matanya merem melek. Perasaanya becampur antara malu plus girang. “Asyiiik…golok bakalan ada sarungnye neh….” Tereaknya dalam ati. Pokoknya, penonton ngarti kan ye apa arti ‘golok’. Kagak perlu ditegesin. Dah pada gede.
“Lo, sebut aza sekarang perawan mana nyang elo mao. Tinggal ngomong tuh bacot lo, jangan monyong-monyong aza. Ntar gue datengin. Kalao babenya nolak, biar gue rogoh lak-lakannya….” Belagunya bang Kacung keluar.
“Iye…din, lu ngomong dah ama kite….” Si enya nyamber kayak bensin ketemu api. “Eh, gue denger dari si Jaih….si Marfuah, janda kembang kampung Galian yang elu mao?”
“Hah? Marfuah?” si Babeh nyang duluan nanya. Matanya melotot. Bibirnya atasnya narik-narik ke atas. Jantungnye kayak maling jemuran ketemu hansip.
“Ngape….?!!!” Mendadak si Enya yang blingsatan. Perasaan wadon kan tajem ya. Mungkin dirasa-rasa ada sesuatu nyang laen.
“Ah, gak….kagak nape-nape..” si babeh celingukan. Matanya muter-muter ada yang dia bingung.
“Udah lu diem, kalo lu gak mau ngurusin biar gue yang jalan…” tereak Nyak Rodiah. Maklum, bia kate jawara Betawi, cuman kalo ama bini tua, si Babeh pasti keok.
“GImane din, elu mao kagak ama si Marfuah….?”
“Ah, ngggak ah Nyak….” Ngomongnya setengah. Ada yang ditahan di dada.
“Gak mau?”
“Bukan. Gak Nolak….”
“huuu…..” SI Enyak jeguk kepala si Udin.
Emang dasar si Enyak, die langsung aje benerin kaen yang die pake. Takut melorod kan repot. “Nyoook..sini ama enya..kalo lo takut…” langsung aza tangan Udin ditarik. Ampe brosot dari bale bamboo.
Jalannya si enya ama Udin kayak karyawan mao ambil gajih. Cepet banget. Si Udin di belakang ampe kepladug-pladug. Ngelewatin puun rukem, terus melengso ke kiri. Abis itu ada puun duren yang gede. Pasangan enya ama anak ini ambil jalan kiri. Biar becek teus aza diiles, cuman karena belon zamannya pake traso, jadi jalannya terus aza. Abis itu naek getek bang Jalih nyebrang kali Bekasi. Zaman iu aer kali bekasi masih bening kagak kayak sekarang yang udah item kagak karuan. Kampret!
“Salam lekooom…..” tereak Nyak Rodiah. Matanya celingukan. Melongok ke dalam. Ada orang kagak.
“eh, Cing Rodieh ada ape? Siang bolong gini datang ke rumeh aye?” dari dalem Marfuah langsung nyang nyambut. Aih, marfuah….
Matanya si Udin langsung berkunang-kunang. Bibir tipis merekah merah persis kulit ninjo. Alis item berderet bak semut beriring. Giginye bediri rapi kayak Jaro bikin Kong Majan, tukang bambu di pangkalan bambu. Kalau sekarang adanya di belakang Giant, Bekasi barat.
“Iye, gue mao nyampein berite bagus neh buat elo ama enya lo….” Si Enya senyuum. Tuluuuuus bet. Soalnye, die mikir bakal punya mantu.
Marfuah berseri-seri. Bulu matanya jingkrak-jingkrak. Dalam atinya berbisik, bener amat ya kalo ada bini tua ngerestuin lakinye kawin lagi.
“Gini, elo..... gue mau lamar buat anak gue si Udin ini….”
Kayak disamber gledek, Marfuah mendelik. “hah? Kawin ama si Udin?”
“Iye. Ini kan die anak gue, masih pejaka, ting-ting lagi….”
“Wah, maaf…kalo gitu….” Si Marfuah langsung tutup pintu yang terbuat dari puun nangka. Langsung lari ke dalam dan nangis. Ninggalin Nyak Rodiah ama si Udin melongo. Kagak paham.
Mendadak, dateng Ki Madun. “Rodieh, ngapain lo di sini siang-siang?”
“Ah, kagak. Gue mao ngelamar si Marfuah buat anak gue si Udin…eh, malah ditutpin pintu”
“Wah, kagak saleh neh gue denger…” Ki Madun ngurek-ngurek kupingnye sendiri.
“Ye kagak….emangnye nape?”
“Lha, belon ngomong ya si kacung ama elu?”
“Ngomong ape…?”
“maaf neh ye…gue ngomong. Ini udah soal syareat. Kagak boleh prempuan yang udah dilamar ama orang dilamar lagi. Apalagi, nyang ngelamar babe lu sendiri. …” sesaat Ki Madun diem. Narik napas bentar.
“Ini maaf beribu maaf, ini soal ugame kite. Karena lo dua ari yang lalu si Kacung udah nikeh siri Marfuah….”
“Bujuuuuuuuug……..kuampreeeeeet! Gue potong………”
[bersambung ke babak ke 2, ikutin terus episode Nyak Rodieh Ngoncoq Bang Kacung….” Montong nibla ke mane-mane ya, kite ikutin siaran niaga berikut ini….]
