Kalawarti Wedang Kopi

Tak gelar kalawarti
Dikancani wedang kopi
Critane nggegirisi

Ing negara tangga, kawulane ora marem
Sedya ngumpul arep ngetoke nurani
Panguwasane methukke kanti wadya bala
Sing dadi tentara lan polisi nyata adi lan ponakan dhewe

Tak gelar kalawarti
Dikancani wedang kopi
Critane lucu

Ing kutharaja, kena bledug awu, kabeh dadi klawu
Endi kyai, pundi ingkang politisi, ora cetho
Sapa pulisine, sinten dados malinge, ora genah
Pamong praja gaweane ngemong rasa, ya rasane dhewe
Pengayom negara mung ngayomi bala, ya balane dhewe

Tak gelar kalawarti
Dikancani wedang kopi
Critane aneh

Ing kutha tangga, saiki nglumpuk para warga
Padha ngganggo seragam lan gendera klub
Ora nyengkuyung tandingan tapi adu jagoan
Iki arep ngopeni bal-balan, apa ngurusi kursi?

Tak gelar kalawarti
Dikancani wedang kopi
Critane nganyelake

Anakku gus bocah lanang
Nggendhong rangsel mlebu ngomah saka wetan
Ora uluk salam langsung ndongeng kaya dhalang
Bapak, kita telah kehilangan arah reformasi
Presiden itu banci, tidak berani selesaikan semua korupsi
Negara tetangga sekarang berani, kita tak punya harga diri
Pengangguran meningkat, juga menggilanya inflasi
Buntute, ongkos sebulan kuliahku yang biasanya sudah tak cukup lagi bapak.

Tak lempit kalawarti
Tak entekke wedang kopi
Arit tak candhak, kranjang tak sunggi

"Mau kemana Bapak?", bocah bagus takon
Kojahmu pinter, utekmu keblinger kakehan teori
Iki jenenge arep mangkat ramban, pandengen sing setiti
Butuhku saiki mung suket seger kanggo pakan sapi
Kanggoku tlethong luwih migunani tinimbang critamu kuwi
Kena kanggo ngrabuk tela uga tanduran pari
Bocah modhel kowe, ora suwi maneh mesthi njaluk sangu rabi
Saka ngendi maneh nek ora adol sapi.