Ketika Sunda-Betawi Gak Bisa Nyambung

foto dapet minjem dari bloggaul.com pade suatu ketike, Sarmili, ngedenger ade suare orang minta tolong. dari suarenye sih, kayaknye nyang minta tolong si Asep tuh, orang Bandung nyang ngontrak di rumahnye Kong Haji Mamat. nyang rumahnye sebelahan gitu ame rumah Sarmili. "TULUUUUUNG, TULUUUUNG, TULUUUUUNG !"sebagaimane biasanye orang asli Sunda ato si Cepot tereak minta tolong di acara Wayang Golek. Sarmili buru-buru tuh nyari dan ngejer sumber suare itu. gugup banget dah pokoknye, sampe kemudian die berhasil nemuin sebuah sumur, sumber asal suare orang yang tereak-tereak minta tolong. "ASTAGHFIRULLOH. ASEEEEEEP..."jerit Sarmili pas die ngeliat dibawah ade orang lagi timbul-tenggelem dan megap-megap kayak orang bengek lupa minum Napacin. Sarmili buru-buru ngambil tangga yang kebetulan disimpen pas banget dibelakang rumah Kong Haji Mamat. Maksutnye sih mau buru-buru ngulurin itu tangga ama si Asep. biar cepet keluar dan terbebas dari kesengsaraan nyaris tenggelem di sumur. "Lagiaaan Lu, Seeep...pake kecemplung sumur segaleeee"bilang Sarmili gemes, sambil siap-siap mau ngulurin itu tangga ke dasar sumur. Waktu itu tangga dah siap diulurin ke dasar sumur, teriakan minta tolong-nye si Asep robah jadi teriakan,"YA, SIP, TARAJE, TARAJE....!!!!" (taraje=tangga dalam bahasa sunda). Sarmili memandang aneh ame si Asep yang timbul tenggelem di dasar sumur tapi keliatan girang banget sambil bilang "TARAJE-TARAJE-TARAJE". "Lu Gile kali yeee... mo gua tolongin malah ngomong TARAJE !" "IYA LI, TARAJE, TARAJE, CEPETAAAAN !" Sarmili ngernyitin dahinye pas Asep ngulangin ngomong kata-kata nyang sama untuk kesekian-kalinye. "Si Asep lagi latihan nyelem kali ye... mo gua tolongin kok terus-terusan bilang begitu ?"pikir Sarmili."Ya udah deh, lagian gue mesti cepet-cepet ke kios nih. kesian ibu-ibu nyang mao beli beras." Sarmili ngelempar begitu aja tangga yang baru aje die ambil disamping sumur. Abis itu die pergi deh ninggalin si Asep sambil misuh-misuh,"Apa kagak ade tempat lagi buat latihan nyelem apa ! bikin kaget tetangge aje lu, Sep." Waktu si Asep tereak TARAJE-TARAJE untuk ketiga-kalinye, Sarmili bales neriakin si Asep,"IYEEEEE, GUA GAK AKAN GANGGUUUU !" ** Singkatnye, Sarmili ninggalin si Asep terus pergi ke kios berasnye di ujung jalan itu. lagi asyik ngeladenin ibu-ibu yang pade beli beras, tiba-tiba ade mobil ambulan puskesmas yang ngebut masuk ke jalan menuju rumahnye. "Sebentar ye, Bu..." kata Sarmili sambil pamit buat ngeliat kearah mane ambulan menuju. "Loh, kok ke deket rumah gue yak ?" Tanpa ba-bi-bu Sarmili langsung lari aja kearah ambulan, yang berenti tepat diantare rumahnye ame rumah Kong Haji Mamat. orang-orang udah pade ngumpul tuh di situ. lagi celingak-celinguk tiba-tiba die ngeliat ade orang digotong masuk kedalem mobil ambulan.diantara orang yang ngegotong, ade tuh, Sapi'i, kakaknye.langsung aje Sarmili nanya ama Sapi'i, yang gemeteran kayak abis kecebur kolam ato sumur. "Bang, siape nyang digotong ?" "Entu, si Asep. untung aje gue, si Acung ama Mas Bejo jalan lewat kebonnye Kong Haji. Kalo enggak, si Asep udah ko'it tenggelem di sumur !" "Tenggelem ? bukannye die lagi latihan nyelem ?" "Latihan nyelem ? Buaya eksim Lu ! Masak ade orang latihan nyelem di sumur ? Lu, kire lubang buaye !" "Loh, tadi gue juga ngedatengin sumur itu ! Abis denger si Asep tereak minta tolong !"bentak Sarmili ame Sapi'i,yang kaget setengah mati waktu tau Sarmili sempet lewat ke situ. "Nah, kenape lu gak tolongin die ?!!!"kate Sapi'i balik ngebentak adiknye. "ORANG MAU GUE TOLONGIN DIE MALAH BILANG TAR AJE !"bentak Sarmili dengan gagahnye. (tar aje= nanti saja dalam bahasa betawi) *Ataw*