Wis kaya lumrahe, saben Setu bengi para bapak sing padha seneng melekan padha jagong ( dudu jagung lho….) sangisore cagak listrik ing pertelon kampung. Sajroning jagong sing diomongake nalika iku bab manuk kutut ingon-ingone Mas Darto.
[caption id="attachment_174915" align="aligncenter" width="500" caption="Manuk kutut. Sumber: medan.oxl.co.id"][/caption] Pancen Mas Darto kuwi, seneng ingon lan dodolan manuk kutut. Jarene, regane ora munggah mudhun. Tetep larang. Beda karo manuk liyane kayata manuk Kenari, Cucak Rowo, utawa Kepodhang. Sing marakake larang regane kutut kuwi swarane sing ulem tur bisa sesautan karo liyane. Jarane saya larang regane yen bisa manggung wayah bengi. Regane nganti puluhan yuta. Mboh bener apa ora……
“ Arang manuk kutut bisa ‘muni’ yen wayah bengi…..” jarene Mas Darto.
Bapak-bapak sing ora seneng ngingu manuk mung ‘ngiyani’ saderma ngguyupi Mas Darto.
“ Sing kurungane werna abang kae regane limang yuta jalaran swarane ulem lan ora mandhege.”
“ Bisa ‘muni’ bengi Mas….? Juraganku sing sugih kae golek kutut sing bisa ‘muni’ bengi,”pitakone Mas Dhanu sing rada mekithik.
“Oo….bisa-bisa. Wingi dienyang wong saka Blitar petang yuta, ora dakwenehake. Nanging kanggo juraganmu, yen pancen gelem dakwenehake. Sing sakyuta kanggo rika dhewe…”
“Wah…..tenan ta kuwi? Bisa dicoba?”
Mas Darto, Mas Dhanu, aku lan bapak-bapak sing cacahe ana telu banjur menyang ‘terasan’ omahe Mas Darto sing akeh kurungan kutute. Banjur Mas Darto anil ( bersiul ) nyeluk kutut sing ana njero kurungan werna abang. Krungu anile Mas Darto, si kutut banjur nyaut manggung …… kuur…kutut..kutut… ( mboh swara kutut manggung apa pancen kaya ngene, aku ora bisa nirokake….)
“ Lho jarene bisa muni ‘bengi’ …. lha kok mung manggung?” pitakonen Mas Dhanu.
“ Lha iya iki bisa manggung utawa muni ing wayah bengi,” Mas Darto negesake.
“ Yen karepku, kutute bisa muni ‘bengi…bengi…bengi…’ dudu muni utawa manggung ing wayah bengi,” semaure Mas Dhanu.
Krungu wangsulan kaya mangkono, Mas Darto muntab lan misuh-misuh. Aku lan para bapak uga padha kaget, yagene Mas Dhanu sing mekithik kok guyonan sing marakake nesune Mas Darto sing seneng umuk pisan.
Aku mung mesam-mesem, dene bapak-bapak liyane banjur padha bali menyang omahe dhewe arep ndeleng bal-balan ing TV utawa bal-balan dhewe ……kwek!
Sesuke, nalika gotong royong ngresiki got, dak deleng wong loro kuwi wis padha akur maneh. Ya sukurlah ora kedawan-dawan.
Setu Paing, 6 Jumadil Akhir
Ereng-erenge Redi Meru
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
