Bapa Yakobus Doni Beda, Amak senare kelemune...
Nuan go mehen kai hode anam geniku bahim, tite hugun pupu rebun baun di mehe muan, wahak debedela.
Naku mo peten mayan kame perohon pesayang kame maan onekem kuat kemuha bapa.
Koda tou goe ko anam Renya mete peten kepae ulika te pe reron kame ruakem berkat, bapa mo marin; selamat anak rua kae, mo tenan peten balik rae lango, kepae beto weli uma, tobo gelaha bua bau taan mupune, weli Lewotanah Nihaone.
Kame peten pnuket, pehen mege koda moen nein kame ni bapa, kame ni mo anam bapa, mabe jadi tali, mabe di sura lekat.
Peten kame bapa hulen tede kame ana moen, sudi bahim kame ama jaga gerihan kame bahim moen.
Amak Yakobus Doni..
Reron getan weli lango ata berara, goe hewo beto toin hule moe bapa, mo geruren peten dahan anak Renya degaku?
Bapa, mo peten pesayang anam mela sare raina bapa.
Nuan kame hewo te moe bapa, moe ata raen kae, Ama Belen Rera Wulan nabe na hodeko bapa, moem senan kae bapa.
Bapa,
Onekem medo yonekem data, hulen ina Somi Pehan, inak melan senare na tobo tani pae hutan mayan ole ama ole ama, mabe daharo di hala.
Ina Somi Pehan tobo tani helon urut golek ile boleng, matan teperohon seme kowa papan rera. Kame leta senan geka teka paharo balik ama ew..
Peten kame bapa, sudi hulen tede inak Somi Pehan mooro hama-hama sape mai letu matam odo nain, nuane pireron na meha tepi lango tapan laran pao notin anam cucum ama.
Bapa, pireron ni mo maiko bapa, pana maan onem mela mela bapa.
Ama, pihari ni mo pekenem ama, gawe maan yonem sare sare ama.Bapa Yakobus Doni Beda, Amak senare kelemune...
Nuan go mehen kai hode anam geniku bahim, tite hugun pupu rebun baun di mehe muan, wahak debedela.
