Percaya Kana Takdir

Naon nu paling jauh jeung paling deuket di dunya?
Aya nu ngajawab matahari, bintang paling jauh. Eta jawaban bener tapi nu paling jauh mangsa ka tukang, Urang moal bisa balik deui ka mangsa nu geus kasorang.
Nu paling deukeut jeung urang, Bapa, Ibu, adi lanceuk, salaki, pamajikan. Eta jawaban oge teu salah. Nu paling deukeut jeung urang nyaeta Al maut. (Imam Al-Ghazali RA)

Jumaah isuk, 21 Januari 2022, tabuh 06:15 WITA, aya musibah di Lampu Beureum, Muara Rapak, Balikpapan, truk Tronton rem blong, ngararad 6 mobil roda opat, 2 angkot , 2 mobil pribadi, 2 pik up, 14 motor. Korban 4 urang maot di tempat, welasan jalma tatu beurat jeung hampang. Tetela sarat maot teh lain gering ripuh atawa geus kolot tapi jalma jagjag waringkas oge bisa teu puguh-puguh maot ditubruk truk.

1 Januari 2006,  PT Semen Cibinong Tbk ganti ngaran jadi PT Holcim Indonesia Tbk. Supir-supir truk Holcim pilih genti kudu milu training saminggu. Kuring jadi kepo (Knowing Every Particular Object). Naon nu diajarkeun ka supir-supir nu geus boga pangalaman nyetir truk mang taun-taun piraku ngajar ngojay ka meri mah. Kukituna saban aya truk ngirim Semen Holcim ka toko sim kuring sok ditanya naon wae nu Training Sopir Holcim teh. Jawaban kabeh sarua nyaeta mobil truk kudu aya jadwal ka bengkel mariksa rem jeung sajabana. Mobil truk lain mobil sedan, lumpatna  di wates 20 - 40 km sajamna kulantaran lamun lumpat 60 km per jam,  muatan 640 zak semen x 50 kg = 32,000 kg, ku gaya gravitasi bakal nyurungkeun mobil, moal katahan ku rem lamun aya ka kagok. Rem truk lamun hantem ditincak  matak panas kana toromol tuluy wae rem blong. Lamun rek manggih pudunan, eureun heula 30 menit niiskeun rem, beak pudununan eureun deui 30 menit niiskeun rem. Ti Cibinong ka Tasikmalaya paling saeutik mobil truk kudu reureuh 2 atawa 3 kali. Lamun aya truk semen eureun di Warung Ci Kopi nu geulis, ulah sok goreng sangka. Hiji waktu aya sopir truk semen mahiwal ti nu sejen. "Abdi mah tara eureun langsung wae ka Ciawi, Tasikmalaya." jawab manehna. “Maneh ngabohong.” Ceuk kuring dina jero hate. Isukna aya nu truk ngirim semen. ku kuring ditanya. jawabana  reureuh 3 kali. Naha geuning  aya batur Bapa nyebutkeun tara eureun , tanjeb langsung ka lokasi? Bari seuri manehana nembalan: "Bener eta si bedul mah tara eureun, tigebrusna  ka jungkrang oge geus 2 kali tapi teu modar-modar."

Percaya kana Takdir?