Ora Kaya Yen Mbethot Tela

FGD (Sumber Pribadi)

ORA KAYA MBETHOT TELA

Nylinthis pancen ya kudu nylinthis, kuwi sing dadi gamanku kanggo napak laku kanggo obahe sikil, ati, driji uga pamawas kanggo ubarampe isine stand. Kalebu apa sing lagi wae daklakoni ing Apresiasi GTK 2024 sing dianakake dening Dinas Pendidikan, Kepemudaan, dan Olahraga Kabupaten Magetan. Paling ora wujud anane praktik baik kudu bisa dipajang.

Mula nalika sapatemon ya banjur dakkandhakake lan aku miwiti nggawe conto dhisik. Kamangka aku mung entuk harapan siji, conto sing dakgawe ing Canva ana barcode aksi nyata lan praktik baik kuwi banjur kanggo pagon kanca-kanca liyane kalebu bapak lan ibu kepala sekolah. Sepurane iki ora ateges aku gumedhe.

Aku melu ethoh ing acara  Pekan Pasar Rakyat Magetan ing taun 2024 bebarengan karo kanca-kanca kanggo ngregengake 349 umure kutha Magetan. Ya mesthi wae bisa kanggo ndhudhah gambar-gambar lawas sing isih kesimpen ing telenge ati.

Mikir isi, wira-wiri usung-usung apa wae sing kanggo isine pameran, guyonan karo kanca, ngopi ing pojok GOR, bengkerengan karo wong, nyawang esem lan guyune kanca sing padha ethoh, kahanan ruwet, hlo kok ya katon endah ing wengi iki nalika aku budhal menyang GOR Ki Mageti.

Jejege nglabuhi ethoh sanajan sithik muga ana guna. Amarga apa? Arane ngawe lan ajak-ajak marang sok sapaa iku ya wigati. Aku diawe lan diajak, apa ya banjur nolak, kanggoku ora ilok. Kabeh kuwi kanggo ngenyangi wujud dadi guru, banjur bisa gotong-royong supaya lumaku kanthi lancar kanggo nyengkuyung kekarepan ngenyangi bumi kelairanku lan anane Kurikulum Merdeka. Yen awake dhewe bisa ngenyangi dhisik lan bisa kanggo tuladha marang bocah-bocah,  kiraku ya bakal luwih kepenak. Angele kaya apa ya kudu dicoba, sanajan gotong-royong ngrengkuh sakeh wong kuwi ya ora gampang.

Nalika nata isine stand, aku kok banjur kelingan ngendikane Mbah Woto, "Saya senang bersama orang gila." Pangandikan kuwi bisa dadi usada nalika mlaku napak ing dalan-dalan rumpil. Ora mung kuwi wae aku kelingan nalika matur ngenani sengkalan Manunggaling Rasa Suka Hambangun sing dadi tenger madege Magetan kala semana ing taun 1675. Sengkalan kuwi mesthi diyasa dening piyantun sing ngudi banget ngenani Magetan, nanging emane ana sing ora pas urutane. Sengkalan kuwi anggone maca saka tengen, mula yen diwaca dadi 5761. Piye yen wusanane kaya mangkene? Pancene ndhudhah barang-barang sing wis kependhem kuwi ora gampang, ora kaya yen mbethot tela.

Rembug sengkalan dakambali maneh ing panggonan sing padha, yaiku ruang jamuan Surya Graha tanggal 24 September 2024, ing acara Forum Group Discussion. Apa sing dakkandhake kuwi ya banjur dibenerake dening Mas Puthut saka Sidaarjo. Magetan tresnaku, ngancik umur 349 taun, sengkalan tenger lairmu isih angel kalari.