Pindha Guwa Hira'

Sumber  : Pribadi

PINDHA GUWA HIRA’

Tanggal 15 September 2024 dadi tenger nalika nekani Festival Sastra Iman Budhi Santosa kaping loro. Acara kuwi dianakake ing Perpustakaan Dbuku Bakti Bangsa, sing uga dadi daleme Mbak Sasa. Mbak Sasa sawijining sosok pegiat literasi sing kagungan perpustakaan kuwi. Panggonan sing dadi pusat kegiatan literasi lan budaya, kaya ta ing wektu kuwi ana acara lomba maca puisi karya Iman Budhi Santosa, uga pangalembana marang Mbah Woto (Bupati Magetan 2028-2023) minangka Penggerak Sastra di Magetan. Festival Sastra Iman Budhi Santosa wis diwiwiti sedina sadurunge kanthi acara Bengkel Sastra.

Kahanan gayeng lan guyub nalika para guru lan wong tuwa ngeterake bocah-bocah sing melu lomba maca puisi lan para sutresna sastra mlumpuk dadi siji. Awan nganti sore dianakake lomba maca puisi karyane Iman Budhi Santosa. Sapa ta Iman Budhi Santosa kuwi? Yaiku sastrawan asli Magetan lan dedunung ing Yogja nganti seda. Ing kalodhangan kuwi, Mas Gito sing dadi juri lan panata cara pancen ngudubilah. Mula acara ya lumaku kanthi ora krasa kok wis tekan pungkasan. Akeh ilmu sing bisa dakgawa bali saka apa sing dingendikake.

Setaun kepungkur, aku melu nekani acara Festival Iman Budhi Santosa nalika launching buku seratane kanthi irah-irahan Magetan Bumi Kelahiran. Sithik akeh aku ngerti sastrawan kondhang saka Magetan ya saka buku kuwi. Eman banget aku durung tepung karo piyantune, amarga wis kapundhut ing taun 2020 kepungkur.

Bengi kuwi aku ketemu Bu Titik, ngobrol sedhela, ”Wingi aku ketemu Nyonya,” ngono ngendikane marang aku. Bu Titik rawuh didherekake Mbak Nina amarga Mbah Woto tindak Jakarta. Mula Bu Titik makili nampa Piagam kanthi tenger Penggerak Sastra Kabupaten Magetan ing acara Festival Sastra Iman Budhi Santosa.

Bengi kuwi kok ya banjur tansah pating sliwer apa sing dakalami, sasuwe Mbah Woto ngasta bupati ing Magetan. Aku arane guru ndesa bisa kerep ketemu karo panjenengane lan kerep nampa dhawuh ing babagan ethohe driji. Sehimpun Mutiara Literasi Indonesia aku ya diajak nulis lan diutus golek kanca. Seminggu sadurunge buku dadi, aku entuk WA supaya kanca-kanca HB (Hujan Buku) diajak sowan ngadhep bupati sing wektu kuwi lagi gerah sukune sawise ndherek volley. Sore ana Pak Suwata (Kadis Dikpora), Bu Sriyatun (Ketua HB), Pak Kadi, Pak Joko lan Bu Suci.  Aku uga matur yen biaya kanggo Buku Sehimpun Mutiara Literasi Indonesia wis takbayari. Mbah Woto banjur ngendika ”Bupati kok malah dibayari ki piye ta?” Kedadean kuwi uga kenangan sing katut sliweran ing panyawangku bengi kuwi.

Saliyane nyerat Bupati Menulis ing Jawa Pos, Kembang Setaman ing Panjebar Semangat, uga kagungan wujud buku, yaiku Menjahit Mimpi Rakyat telung jilid 2018-2021, Government Public Relations 2019, Antuk Amanah Bupati Magetan 2023, Email Saka Jakarta telung jilid 2020. Mligi buku Email Saka Jakarta kuwi seratan ing Panjebar Semangat wiwit taun 2019 nganti 2020. Kanca-kanca MGMP Basa Jawa, yaiku Mas Romy, Mas Andi, Mas Slamet, Mas Andri, Mas Joko lan Mas Kadi sing melu nata.

Mbah Woto sing visioner lan literat, kanggoku ya wis samesthine nampa anugrah ing babagan literasi. Sapa wae bisa sinau, kaya apa sibuke dadi bupati isih bisa nyerat lan ajeg kanthi rong basa, yaiku Indonesia lan Jawa. Kala-kala nalika ketemu uga ngendikan kondur jam rolas bengi langsung ngrampungake tagihan saka Panjebar Semangat utawa Jawa Pos. Mula Bu Titik ngendika, yen ruangan panggonan nyerat kuwi diibaratake Guwa Hira’.