Emak,..jase ma pengorbanannye memang kagak ade duanye. Mulai dari ngegondol orok selame 9 bulan waktu bunting trus taroan hidup ma mati pas ngelahirin. Ngemandiin kite, nyebokin kite, ngasih makan, ngedandanin ,..Subahanallah.
Kagak saleh kalo Agame naro Emak di posisi tinggi ketimbang babe,..eiitt, perhatiian dah hadits, “Surga ada ditelapak kaki Ibu”.
Negare aje ngasih penghargaan buat Emak ! Kagak percaye ? Liat tuh mane ade Jakarte dipanggil Bapakkota ? Ade nggak Nusantare disebut Bapak Pertiwi ? atu lagi, liat dah tanggalan di rumah,..utamanye 22 Desember.
Mao bukti lagi, liat dah Emak ato bini pas bulan puase gini. Beres subuhan trus nyapu ato nyuci, siangan dikit belanje buat ntar dimasak bakal buke.
Kebanyakan waktu kite masih bocah malah ampe deket mo kawin, inget nggak sering nyentak suare ke Emak ? Misalnye,..Ah ntar dulu ngapa !
Duh Romadon ato bulan biase, kudunye kite tetap hormat, ngebakti, patuh me orangtue kususnye Emak. Pe lagi Emak me Babe sekarang udeh kisut romannye karna faktor usie. Nyok kite jage me rawat baek - baek dah orangtue masing – masing, soalnye jasenye mang kagak ketulungan, sering – sering nengokin biar udeh nggak serumeh. Silahturohim ke nyang lainnye bisa kenapa ke orangtue kendiri nggak bisa ! Jangan ampe nyesel kalo laen waktu mo Silahturohim ke Emak me Babe datengnye justru ke batu nisan.
