“Liat noh, anak lu! Ude dua ari nduplong1 aje di deket puun rengas2, samping kandang ayam. Gue takut die kena tetelo, trus mati deh besok,” kate Haji Dullah ame bininye, Hajah Halimah.
“Abang, kalo ngomong sembarangan aje, oranglah, kena tetelo.”
“Abis, gue kesel ame die, ude sembahyang kaga, kerja kaga, kalo kita manusia, diambekin begitu bisa berubah. Kalo Allah mah, mao semuanye manusia ngambek juga, kaga ade ruginye. Ntar lama-lama juga gue pentung palanye, pake pentungan hansip!” Haji Dullah mingkin kesel.
“Lagian, Abang, orang mao kawin dilarang,” jawab Hajah Halimah.
“Gue bukannye ngelarang orang mao kawin, tapi perempuan yang dipilihnye kan cabo3, perempuan malem. Masa Haji Dullah yang guru ngaji ame penghulu kampung eni, punya mantu cabo, mao ditaro di mana muke gue?”
“Bukanye cabo Bang, tapi bekas cabo, si Minah ude insyap. Tadi aje ikut pengajian ame aye. Kate ibu-ibu di pengajian mah, sekarang die sembahyangnye rajin banget,” jawab Hajah Halimah lagi.
“Yang bener lu!? Minah udah insyap? Kalo begitu mah, panggil dah, si Rojali, gue pengen ngomong ame die!” Hajah Halimah trus aje manggil Rojali anaknye. Di teras rumenye yang luas, Haji Dullah ngajak ngobrol bertiga.
“Lu, emang ude berapa lama akrab ame si Minah?” tanye Haji Dullah, ame Rojali.
“Ude lama juga, Be, abis die insyap,” jawab Rojali.
“Kire-kire, die mao nggak ame lu?” tanye Haji Dullah lagi.
“Pasti mao lah, die ame aye, dia pan bekas cabo, jadi lelaki pada ogah ame die.”
“Buktinye, lu mao ame die!?” bentak Haji Dullah, yang dijawab ame cengiran si Rojali. “Kalo die udah insyap, trus die emang mao ame lu mah, besok gue lamarin aje.”
“Jadi Babeh setuju?” tanye Rojali, semanget.