TEKS PRANATACARA
Assalamualaikum wr. Wb.
Nuwun kula nuwun, lumunturing pujwastawa saking Gusti ingkang maha asih hambabar daya pangaribawa ingkang tumandhuk dumateng para kawula dasih. Kacihna ing wekdal menika panjenengan lan kula saged kempal manunggal kanthi karaharjan, katentreman, kabagyan sarta kabagas kawarasan.
Nun inggih langkung rumiyin sumonggo sami manengku pudjo dumateng Gusti ingkang amurbo amaseso, mugi mugi saliring gati wiwit purwa, madya, dumugi wasana lulus raharja kalis ing rubeda.
Para pepunden, para sesepuh sumrambah para sanak kadang pamong mitra pitepangan ingkang tansah pantes hanampi pakurmatan. Nun inggih mundi dawuhipun ingkang hamengku gathi nun inggih Sinuwun Sri Bathara Kresna ingkang wonteng ing ri kalenggahan menika, sampun kalampahan hanetepi dharmaning asepuh amiwaha hamardisiwi hamalakramakaken putro putri kinasih nun inggih Dyah Ayu Siti Sendari sampun kalampahan daup kala wau kaliyan den bagus Bambang Senet atmaja saking Kyai Semar Badranaya saking Karang Kadempel,laladan Amarta sisih wetan.
Ing rikala kalenggahan menika keparengan kula ingkang kapiji anderekaken lampahing adicara pahargyan ing siang menika.
Lampahing adicara ingkang sampun rinakit dening kulawarga ingkang angka sepisan nun inggih pambuka.
Adicara ingkang urut kalih nun inggih lumarabing risang pengantin putri, kalajengaken panggihing pinanganten ngantos dumugi ing adicara kacar-kucur sak panunggalanipun, ngantos ing adicara sungkeman.
Adicara ingkang urut tiga nun inggih atur pambagya harja
Minangka adicara ingkang urut sekawan, manengku puja ingkang ing mangke badhe kasalirani dening Resi Mayangseta.
Sanggya para tamu kakung sumawana putri ingkang winantu ing pakurmatan, mekaten wau menggah rantamaning adicara ing wekdal menika. Sumangga ngenut lampahing adicara wiwit purwa, madya, ngantos paripurna pahargyan ing siang menika.