Skillwise MTs Al-Hadi II: Siswa Kelas IX Sinau Miru lan Kuliner Nuswantara

Bantul (26/10)-Dinten Rebo (23/10), MTs Al-Hadi II ngawontenaken kegiatan skillwise ingkang nengenaken ing pengembangan ketrampilan praktik lan nepangaken budaya lokal. Kegiatan menika gadhah ancas kangge ngrembakaken seserepan para siswa, mliginipun kelas 9 ing bidang budaya lan ketrampilan gesang ing saben dintenipun. Kanthi nggabungaken teori lan praktik, siswa saged pikantuk pengalaman pasinaon ingkang ngremenaken ugi migunani.

Kegiyatan menika dipunpandhegani dening Duwi Sri Lestari, M.Pd. minangka guru basa Jawi. Ing kalodhangan menika, para siswa kelas 9 dipunajari babagan busana adat Jawi lumantar kegiyatan miru jarik. Siswa boten namung sinau babagan cara anggenipun nganggem jarik utawi sinjang ingkang leres, nanging ugi mangertos makna filosofis ing salebeting busana tradisional Jawi kasebut. Antusiasme siswa sae sanget amargi nalika nyobi ngginakaken sinjang menika.

Para siswa miru sinjang (dok. pribadi MTs Al-Hadi II)

Pasinaon menika dados sarana wigati tumrap para siswa kangge langkung mangertos warisan budaya Indonesia, mliginipun babagan busana tradisional. Kegiatan miru jarik ugi gadhah fungsi kangge nepangaken nilai-nilai kesabaran, ketelitian lan estetika ing salebeting budaya Jawi, ingkang dipunajab saged dipunginakaken dening para siswa ing gesang saben dintenipun.

Dinten kemis (24/10), gantosan pasinaon prakarya ingkang dipunpandhegani dening Riza Fauziah, S.Sn. minangka guru prakarya. Ing pasinaon menika, para siswa kelas 9 sinau babagan pengolahan asil perikanan kanthi maneka cara anggenipun masak. Ing kegiyatan menika para siswa masak utawi ngolah menika warni olahan ulam kados ta nila asam manis, katsu lel, nila bakar, lsp. Saben kelompok siswa katingal aktif kangge nyamektakaken bahan, masak lan anggenipun nyawisaken asiling masakan.

Para siswa nyamektakaken ulam kangge masak (dok. pribadi MTs Al-Hadi II)

Ancas saking kegiyatan menika inggih kangge ngembangaken ketrampilan para siswa ing babagan kuliner, lan ugi nepangaken potensi pengolahan ulam ingkang melimpah ing wilayah Indonesia menika. Lumantar kegiyatan masak menika, para siswa dipunajab saged langkung mangertos babagan proses anggenipun ngolah dhaharan wiwit saking milih bahan ngantos teknik masak ingkang leres. Kejawi menika, kegiyatan menika ugi caos seserepan babagan pentingipun kerjasama tim, ketelitian lan kreativitas anggenipun ngripta olahan ingkang eca lan bergizi.

Salah sawunggaling asil olahan ulam nilai, pepes nila (dok. pribadi MTs Al-Hadi II)

Program Skillwise ing MTs Al-Hadi II menika nggadhahi ancas supados para siswa boten namung pikantuk pengetahuan akademik, ananging ugi ketrampilan praktis ingkang sage dipunginakaken ing gesang saben dintenipun. Pasinaon ingkang nggayutaken babagan budaya lan ketrampilan hidup menika dados pengalaman ingkang sae, ingkang ndadosaken seserepan langkung wiyar ugi ngasah kemampuan para siswa ing maneka warni bidang. (DSL)