Kerne ujan gede banget, keluarge Bang Toing kagak berangkat teraweh ke mesjit, napi bang Toing kagak mau ibadeh terawehnye ditinggalin. Ahirnye tetep solat teraweh napi dirumeh aje. Si Udin anak nyang tue disuruh ngimamin napi kagak mau, alesannye babe nyang lebih afdol jadi imam. Terpakse bang Toing jadi imam teraweh, napi ade nyang ngeganjel diati bang Toing, soalnye bang Toing kagak banyak apal surat-surat pendek nyang apal cuma surat alhamdulillah ame kulhu (surat Al Fatihah ame Al Ikhlas)
Rakaat pertame ame rakaat kedua berjalan lancar, anak-anaknye seneng banget kerne terawehnye ntar cepet selese
Pas mau mulei rakaat ketige anak-anaknye ngomongin babenye
” Pasti kulhu lagi nih ! ” : kate anak keduenye
” Wah !, gawat nih modal gue udeh tengsin ( ketauan ), gue cuma apal kulhu ” : kate bang Toing dalem atinye, napi tibe-tibe
” Yaasiiin ! ” suara bang Toing bawain surat yaasiin, sontak aje anak-anaknye kaget
” Eh !, surat yaasiin kan panjangnye 83 ayat, mendingan tiduran dulu, kalo bediri terus bisa teklok nih dengkul ” kate anak nyang nomer tige. Belon sempet anak-anaknye tiduran tibe-tibe bang Toing ngucapin takbir. Ternyate baca surat yasiin nyang diapal ayat pertamenye aje.
Anak-anaknye ngedumel, kirain beneran babe apal entu surat yasiin, kagak taunye cuma atu ayat doang apalnye.