Basa kami keur leumpang ka Normandie nya kami panggih jeung camembert dua kali. Moal ditulis kapital da lain jelema, nya ge dibedakan. Teuing dibedakan teuing ngaluarkeun bedak sorangan.
Mimiti panggih jeung camembert nya di jero beus. Aya budak Kamboja nawaran hayang teu camembert. Ceuk kami: oh eta camembert teh. Terus bae kami nyebut-nyebut aran Dali, pelukis Spanyol. Si budak Kamboja teu apaleun.
Di Normandie keneh asana kami leumpang kukurilingan dan teu jelas tea beus deuk indit deui jam sabaraha. Niatna mah hayang nepi ka Mont Saint-Michel tapi nya kitu ngaranna ge naek beus umum, ngetemna sok lila, turun weh kami di dinya.
Ceuk supir, "Bilih hoyong terang hotel Evreux!" manehna nunjuk arah jalanna.
Ngaranna jelema keur teu jelas tujuan, ah ngojengkang we nuturkeun curuk supir. Enya, aya hotel teh. Tapi deuk naon oge deuih.
Samemeh nepi ka hotel kami asup ka pasar leutik, bisa ningali lauk saleger, sasayuran, bubuahan, oge camembert. Jadi, dua kali kami panggih! Ceuk kami ieu Dali aya di pasar tradisional oge jing.
Aya dua kali kami ningali gembel nu sarua: basa turun dina beus, jeung basa balik deui ka tempat ngetem beus. Eta gembel nunungtun anjing koneng jangkung cekung. Gembel lalaki umuran 50-an, peang, tapi lengkahna panjang da bari kabetot si anjing. Ditilik-tilik si gembel jeung si anjing sasetel pisan.
Ceuk kami, "Kang, eta anjing dia anjing andalusia lin?" Manehna unggeuk. Surti manehna ge, teu kaget teuing, pedah tadi pernah pateuteup panon di tempat ngetem. Teuing unggeuk ku ngarti teuing nu penting unggeuk. Tapi saha nu nyaho manéhna apaleun film Dali Un Cien Andalou
Tapi mun heueuh nu model kitu anjing andalusia, sigana teu jauh-jauh teuing camembert-anjing-Dali jeung kami harita. Sahenteuna alam dunya mah sadaun kelor. Leutik. Lega keneh lukisan Dali The Persistence of Memory. Aya laut, aya tebing, aya pantey, aya eureun: laut teu usik, jam teu usik, beugeut jelema teu usik, tapi karasa ngelay.
Da heueuh sedih ningali gembel di Normandie ge bisa manjangan siga jam dina lukisan Dali: nya panjang nya ka kabetotan anjing lapar. Alatan lapar leumpangna rusuh nuturkeun indra pangambeu.