Anding-Andingen (Perumpamaan Karo)

Saya mencoba menuliskan anding-andingen (perumpaan KARO) berdasarkan Abjad yang saya dahului dari "A" semoga bermanfaat. MEJUAH JUAH KITA KERINA.

ABAL-ABAL

1.Erbuat bengket bagi tutup abal-abal.

Ikuanten man kalak si pengelako pendahinna maka akapna reh beratna. Umpamana, icuba erbinaga ngelepas-ngelepasken nakan. Binaga rugi tangkel utang.

ABANG-ABANG

2,Kelaling-kelaling bagi bunga abang-abang.

Iandingken kempak jelma si lanai erturi-turin pergeluhna, la lit teman entah kadé-kadé si nampati.

AJAR

3.Ajari bancina.

Ibas sada-sada pendahin entah pé sada-sada tempas kinigeluhen siakap kita la ngasup ijé. Tapi adi reh maksa kecibalen, ngasup kang kepéken. Umpamana, sesekalak la akapna ia ngasup erdalan ndauh. Tapi kenca terpaksa ngungsi, kukerangen pé ngasup kang erjujung.

AGENG

4.Siagengen radu mbiring, sikuningen radu megersing

Antusenna, adi sician-cianen, sipecat-pecaten, peképar rugi, peképar mbau. Tapi adi siajar-ajaren, sisampat-sampaten, peképar memerim, peképar menahang.

ALO

5.Adi ngalo la rido, nggalar nge la rutang.

Antusenna, adi la arah orat rejeki reh, la ka boa rah dalan sinanggel tangkel.

AMAK

6.Ngkimbangi amak babo lubang

Andingenna, kalak si mehuli kal tempa ukurna adi niidah perbahanenna, kepé aténa menéken.

ANAK

7.Seran maté anak kalak asang anakta

Ndeharanta anak kalak. Antusenna, suin maté ndehara asang maté anak.

ANGGUK - ANGGUK

8.Bagi angguk-angguk pudi terang, iluh mambur la lit si ngapul

Kalak si ngandung tangis nandangi terang wari, nupung kepatén, nggit me la nai kenan apulen. Si aturna ngapul enggo munduk-unduk entah tunduh. Isumpamaken kujelma si kedabuhen sinanggel, tapi la lit si nami-namisa.

ANCIT

9.Bagi ancit, adi ersada rubat, adi sirang sidaramen, émaka inganna jumpa bas gebuk api

Andingenna, jelma jabu sirusur pejentik, rusur rubati adi ersada, tapi adi sirang sitedehen. Emaka bas kerja kesuhsahen rusur dalanna pulung, umpama kerja kepatén.

API

10.Bas lau nari gara api

Si aturenna pedaméken reh pegebuken, maba pecah perang. Umpama bas ranan. Idilo anakberu pejorésa. Kerehenna la pekenaken, tapi pegebuken, she ranan é rontang.

11.Adi pajek gara api, kugapa pé rubati.

Gara api pajek adi si man tanggerenken la lit. Ertina, adi

12.Ngutkut bagi api bas segal.

Ikatakén kujelma si permenek, nggit ngerem-ngerem ukurna. Aténa segat entah morah-morahna ibuni-bunikenna. Seh mawen-mawen dagingna kertang itindan-tindan ukurna.

ARANG

13.Keri-keri arang besi la tembé.

Pé ningen : Arang keri besi la tembé

Sibar ngasup enggo ikeriken, tapi sura-sura la seh. Umpama guna nekolahkenanak, urang tua enggo tungtung kapur, lembu idayaken, sabah iputangken, tapi erkitéken anak la raté tutus, sekolahna la rasil.

ARAS

14.Aras jadi namo

Kalak si mesera babanna nggeluh jadi kalak bajak. Kebalikenna, Namo jadi aras. Biasa ka pé ipersada : Aras jai namo, namo jadi aras. Ipaké ngandingken kumalih jaman., kalak si musil jadi joré, si joré salih kumesera.

ARIMO

15.Ngasuhi anak arimo, jukut nakanna.

Ikuanken kujelma si la terasuhi perbahan seh rojalna, l meteh mehuli.

16.Bagina arimo natap tabé.

Ningkalak, adi arimo ercurmin bas lau, megah akapna ngenehen rupana, seh lupa ndarami nakan. Ikuanken man jelma si labo entabeh babanna nggeluh, tapi la aténa erdahin, perbahan joré akapna bana.

ARINGGENE

17.Bagi aringgené beru-beru, la neren

Iandingken kujelma si la perpang, sitik pé kalak la mehangké. Biasa ikataken man anak perana, si la ibiari singuda-nguda sabap ngkuit pé la pang.

ATE

18.Labo terbuat até tungir asa pungga.

Antusenna, pemindon si kutera pé ibahan la terdemi, pemindon si lang lang. Umpamana danak-danak ngandung. Ipindona gelah itukur kuda.

ACIH

19.Gerantang acih

Ngataken jelma pergerantang, mehantu tempa, tapi situhuna ia percikcik.