Dina raraga paturay tineung kelas VI sinare'ng nae'k kelas I-V SDN I Cisurupan, Taman Kanak kanak Cinta Rakyat, 24 Juni 2023.
Suka bungah anu tanya kendatna kagambar dina sorot mata barudak, timimiti naek kelas rapot sae angkana diwuwuh pengkuh agamana, luhung e'lmuna, je'mbar budayana, rancage' gawe'na.
Acara samen pelajar dimimitian ku mapag kelas VI ku upacara adat sunda ki lengser makalangan, rengke'ne'k ki le'ngse'r matak pogot anu nempo, dituturkeun ku gulang gulang, pager ayu hurung herang,dipirig ku sora gambe'lan, dipasieup ku galindengna sinden, sora suling melas melis ngagerihan hate' nu miang ningakeun sakola boa balik deui.
Kreasi seni anu digelar barudak kelas I-VI jeung TK Cinta Rakyat, kayaning seni tari, jaipongan, drama musikal, calung, oge gondang tampilan alumni SDN 1 Cisurupan lintas generasi.
Gingsir linggih inohong kabid SD Kabupaten Garut, Kang Suryana, Pengawas Bina Hj. Muniarsih, korwas Pendidikan, Kang Damai Mulyana, ketua PGRI Cabang Cisurupan, kang Ade Sopyandi, anggota DPRD Garut Kang Subhan Fahmi, Kepala Desa Cisurupan Kang Mumad, Camat Cisurupan oge hadir.
Dina malem mingguna digelar tabligh akbar, Kersana Kyai Ali ti pangauban Cisurupan me'ke'lan khususna kelas VI, umumna para orang tua siswa, jamaah pengajian, ajengan eusi ceramahna estuning mundel pisan, tatak rama ka guru, taya urut guru, tatak rama ka ibu rama, kasahandapen ka saluhuren, manfaat keur balerea. "Kacida pentingna saupama dina gempungan orang tua siswa ngulem para ajengan pikeun ngamotivasi sangkan lewih suhud diajar, lèwih utama ngagemlèng akhlak siswa" kitu numutkeun Haji Asep Purna bakti pengawas, oge kungsi ngluwuhan Kepala Sekolah SDN I Cisurupan.
Sarengsena pangaosan, digelar wayang bodoran ngamumule seni budaya Sunda warisan ti para wali, kaparigelan ki Dalang Naufal Rohinhea Sunarya Pujaran Giri Harja 2 Garut di ngigelkeun wayang pogot nu lalajo, suka seri, bodoran banyolan matak betah, pituah tina tongtonan jadi tuntunan pikeun nu lalajo.
Malem senenna gelaran penca silat tipaguron, gerak silat barudak dina pintonan silat matak ngahudangkeun sumanget, mangrupakeun olah raga buhun tatali karuhun anu jadi reueus urang sunda.
Gelaran samen pelajar rengse digelar didukung ku pupuhu sakola Budi Firdaus S.Pd, M.Pd, dewan guru, komite sakola, para alumni lintas generasi, Yayasan Himpunan Alumni SDN 1 Cisurupan
( HASTA), Pusat Kegiatan Belajar Masyarakat (PKBM HASTA), para tim pelatih Diat Hidayat, S.Pd, Suherman,S.Pd, Asep Koswara, Alumni SDN I Cisurupan.