Cerkak daning Agus Pribadi
Bagus seneng pisan bareng mbojo pitung wulan terus bojone ngandut. Wis kebayang sepira senenge nek deweke diundang “bapak” nang anak kandunge. Ora mung Ida bojone Bagus, jebul mbakyu ipare, Yu Isah uga lagi ngandut sing umur kandutane meh pada karo Ida. Nek Ida ngandut sing pertama, Yu Isah ngandut sing kaping loro.
Ida njaga banget kandutane. Mlakune alon lan ngati-ati, nek nyapu ya degawe alus pisan. Jadwal rutin maring bidan ya ora tau kelalen. Apa sing de prentahna bidan ya dilakoni sekabehane.
Sebalike, Yu Isah ora tau maring bidan. Apa prentahe bidan arang-arang dilakoni. Nek kon nginum susu kanggo ibu hamil ya jerene ora perlu.
“Sing penting sehat. Aku ora maring gone bidane ora maksud ora njaga kesehatan, tapi aku ngrasa sohat koh. Aku cukup nginum banyu tajin, ora perlu susu kanggo ibu hamil,” kaya kuwe semaure nek ditakoni Ida.
***
Dong umur kandutane Ida 4 wulan, Yu Isah njaluk ijolan klambi maring Ida. Bagus dadi ngerti nek kadang-kadang bojone nganggo daster sing wis tau dinggo Yu Isah. Semeno uga, Yu Isah nganggo daster sing wis tau dienggo bojone. Bagus bingung. Ujare Bagus ya bojone klambine ora apik-apik. Semeno uga Yu Isah ya katon klambine sering gonta-ganti ora mung siji. Tapine koh njaluk ijolan klambi?
“De...aku arep takon ya, nanging aja wadi ya?” Bagus takon maring bojone dong lagi nonton tivi bakda Isya.
“Ana apa Mas, ora tau-taune kayane koh degawe serius temen?”
“Kuwe, ujarku ya klambimu akeh, koh egin nyilih Yu Isah. Ya mbok aku isin karo wong-wong mbok diarani ora teyeng tuku klambi.”
“Oh kuwe masalahe, Mas. Lha wong mbokayu karo adi, silih-silihan klambi ya mbok ora papa?”
“Ya ora papa sih ora papa. Naminge ya aku sing kadang ora kepenak maring tangga teparo.”
“Tenang baen Mas. Ora papa koh.”
Bagus ora takon maning maring bojone babakan ijolan klambi. Padahal Bagus ya jane kepengin ngerti sebabe apa? Ya wis lah, tumrap deweke ora kabeh pitakonan kudu ana jawabe. Lha wong bocah nek ulangan nang sekolahan baen ya mesti ana pitakonan sing ora teyeng njawab. Wong kuwe kan ora pada karo komputer. Wong kuwe makhluk sing paling sempurna, nanging ya ana kurange baen. Ora ana menungsa sing sempurna jan sempurna na...kecuali rokok karo lagune “Andra and the Backbone”...Bagus mbombongi awake dewek ben ora kucewa.
***
Bagus seneng nalikane bojone wis USG. Jere doktere koh anake lanang. Janin neng kandutane bojone sing umure wis 7 wulan jere sehat, cairan neng kandutane jere cukup, abote ya cukup. Bagus wis ngrasa dadi bapak sawise weruh jabang bayi sing esih nang njero kandutane bojone. Ora krasa eluhe netes. Bagus krasa bungah pisan, kaya bocah cilik sing ngimpi mabur maring wulan.
Sawise USG nang Purwokerto, Bagus karo bojone balik maning maring kontrakan nang Purbalingga. Nang kontrakan Ida ya rajin nyapu, ngelapi meja. Nek masalah ngumbahi klambi ya direwangi Bagus.
***
Dina Minggu esuk. Hp-ne Ida moni baen. Ida sing lagi nyapu, banjur mlebu njero, njiot HP nang nduwur meja.
“Halo...kiye sapa ya?”
“Aku Ika, adimu”
“Ana apa?”
“Yu Isah mlebu Rumah Sakit, pendarahan...”
“Lha kepriwe bisane sih?” Ida katon mrengangah raine. Kaya bamba sing urung sirep.
“Aku ya ora ngerti...”
Bagus karo bojone ngungun pisan krungu kabar sing kaya kuwe. Esuk kuwe Bagus karo bojone langsung maring rumah sakit nang Purwokerto. Nang ndalan Bagus mung ndonga maring keslametane Yu Isah karo jabang bayi sing esih nang kandutane. Semeno uga Ida, melu ndonga sedawane dalan Purbalingga butul Purwokerto.
Nang rumah sakit wong-wong wis pada kumpul. Kaya ana banjir sing nembe mandan mandeg nang matane wong-wong sing pada tilik Yu Isah. Ida langsung nangis sesunggukan. Kaya wis ngerti ana kahanan sing ora ngepenaki.
Critane perawate, bayine ora bisa diselametna. Yu Isah sing slamet, jabang bayine depundut nang Gusti Alloh. Bagus ora bisa nahan luhe, dong weruh ana jabang bayi sing dawa lan putih bagus pisan kaya Landa njrengkanang lan kaku ora ambegan.
***
Ida karo jabang bayi nang kandutane slamet kabeh dong lairan. Cukup nang bidan olehe lairan. Bayine lanang, sehat lan lucu. Bagus bungah pisan.
Dong Bagus lagi nunggoni bojo karo anake nang umahe bidan, Ida ngomong babagan Yu Isah.
“Mas, aku ijolan klambi karo Yu Isah kuwe ya jan-jane ana maksude. Ana sing ngomong, nek ijolan klambi antara kakang adi sing pada ngandute ya ben lairane pada lancare. Ora ana sing ngalahna.”
Bagus nglogog ana pirang-pirang detik. Mikir sedela. Jebul kuwe olehe bojone ijolan klambi.
“Masalah urip matining menungsa kan ana sing ngatur ya kuwi Gusti Alloh. Dadine sing paling penting ya njaluk keslametan maring Gusti Alloh. Menungsa wajib ndonga njaluk keslametan lan urip sing barokah. Donga kuwe namung ditujukna maring Gusti Alloh”
“Iya Mas. Aku uga wis ikhlas nek Yu Isah urung dipercaya dititipi momongan maning neng Gusti Alloh. Aku sekiye sadar, udu masalah ijolan klambi sing mempengaruhi keslametane wong, tapi Gusti Alloh sing ngatur sekabehane.”
Bagus tata-tata arep bali sawise telung dina mondok nang gone bidane. Sawise mbayar biaya lairan. Bagus mboyong bojo karo anake bali ngumah. Bagus bungah pisan, siki wis dadi bapak lan sedela maning anake ngundang “Bapak”.[]
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
