PROLOG  : "Dipermaklumken bahwasanya dalem rangka ikut melestariken, dan menghidup-hidupken kembali daripada  bahasa daerah, maka penulis mencoba menulis dengan menggunaken bahasa daerah  JAWA SUROBOYOan. Dalam dialek Suroboyo, kata2 umpatan  "misuh" adalah hal yang biasa, tanpa sama sekali ada yang perlu di permasalahkan dengan adanya misuh/umpatan  itu. Yuk kita ikuti kisah Munali dan Sokran berikut.
________________________________________________
Jik iki Munali, Sokran  Numpak Montor Muluk.
Munali, sak umur2 sek durung nate lungo adoh opo maneh jenenge numpak montor muluk, ndemok ae durung tau. Lha iki dadak diajak  Sokran keponakane lungo adoh, jange nang Jerman, tilik anake pak de Brodin jenenge Mas Konder sing wes 30 tahun urip nang negarane Hitler dadi wong  sugih. Munali ambek Sokran ga ruh jawane opo2, mak bedunduk dikirimi karcis  . . . . . .( eh nek montor muluk,  tiket yo), karo Meneer Konder, dadi wong loro dikongkon langsung budal. Munggah teko pelabuhan udara Sedati eh Juanda, rencanane marbur sewengi, tutuk Berlin Jerman sesuk isuk uput2 di papak Konder.
Konder milih nukokno karcis gae  pesawat Singapore Airline, sing jarene  jarang molor gak koyo pesawat cap singo, sing lek penumpange telat stitik didendo atusan ewu.  Masiyo  karcise rodok larang tapi jarene layanane apik.  Ngono jarene Konder ndek sms nang hapene Sokran.
Nang pesawat wong loro mau lungguh jejer jedek cendelo, enak iso ndelok njobo, karo sopo weruh engkok ngelak tah  luwe, iso nyeluk bakul jajan sing liwat, pikire Munali.
Tibake numpak montor muluk iku (pikire wong loro iku) gak koyo numpak liyane, penumpange nganggo di taleni sabuk barang, bek ne cik gak tlebok wonge yo. Bengung gak isok masang sabuk, Munali barek Sokran nglirik penumpang sebelahne, tapine kwalik ga isok2, untung ae diprikso paramugari terus masang sabuk diajari pramugari. Mesin montor muluk swarane tambah banter, kroso pesawate  mlayu  buwanter, swarane gremebeg, wong loro mau ndremimil ndonga setengah wedi, karo gak lali tangane nyekeli tas kresek, kwatir bek2 e arep mutah, mabuk udara. Ngono pesene Konder.
Montor muluk (pesawat)  mulai anteng mabure, pramugari seng ayu2 mesam mesem karo  ngedum es jeruk, "walah gelase cik cilike seh", pikire Munali, biasae ngombe wedang  nek gak klempoken durung mandek dadak iki, cik pelite pesawat iki yo. Gleg, Jus jeruk diombe langsung entek, pramugari  teko maneh, mesem2  ngedum kerdusan, wih isine  roti loro rek, tapi cilik2 gak koyok roti seng nang warunge wak Jan gedi2. Rotine sing  siji koyo ager2, sijine roti menuk isi soklat (coklat), begitu ditampani, kerduse wong loro mau langsung kosong, maklum rodo nggragas, drembo dadi roti cilik2 ngono iku yo mik sak emplokan, amblas.
Kroso sereten Sokran ngadek karo gowo gelase nggoleki pramugari, arep njaluk ngombe meneh. Pramugarine wis ayu yo  apikan sisan, anake sopo yo iki. Sokran balik lungguh karo nggowo ngombe limun kalengan. Lungguh plek, kaleng dibukak,  . . . . .croooott, isine muncrat ngeneki raine Sokran dewe, "diamput, diamput. . . . . .  poleh raup limun rek", isine kaleng kari setitik di ombe glek, entek maneh. Sokran ngelapi raine seng gupak limun gae tissu.
Pramugari ngringkesi kotoran, gelas kerdus, siso panganan, mejo di lempit maneh. Wetenge wong loro mau sek durung wareg, lhawong biasane lek mangan imbuh pindo, lha iki diganjel roti cilik2 yo mestiae gak wareg blas. Jange turu, angel, ndase Munali kesentrong angin adem (ac), gak ruh carane nyilikno ac, bolongan semburan angin  ac ditutupi gae tangan. Weruh ngono iku pramugari marani, terus nyilikno ac, lah lumayan,  rodo arep  liyep2 jange  turu, kroso onok wong ambune wangi mbukak mejo, eh lha dalah pramugari teko maneh, saiki ngedum kerdus gede panas, karo banyu ngombe botolan. Kwatir mengko kesusu diringkesi ambek pramugari, langsung wae kerdus panas di bukak, eh hla iki sego to ? Ambune cik suwedepe rek.  Mbuh iki pitik tah opo yo kok gemol daginge, gak koyok pitik goreng ndek warunge yuk Darmi, kuru2 tipis daginge.
Gak srantan, Sokran karo Munali mulai mangan, saking keseusu ne, mangane nggae tangan cik ne lekoh pikire, iwake enak2 segone punel, maknyus tenan, mari mangan langsung banyu botolan di gloglok, glek entek. Munali karo Sokran bingung yok opo iki mari mangan gak onok kobokane, yo wes diklamuti ae tangane sampaek licin terus di lap gae tisu. Mari mangan, oh sek onok buah2n diirisi nang mangkok cilik, di pangan, kuwecute iki buah ijo (kiwi), "buah mentah kecut ngene di suguhno" ujare Sokran karo ngemplok irisan kates gae tombo kecut. Wes, sak kerdus entek kabeh, kerdus jange di dekek, Munali weruh onok sendok garpu plastik sek bungkusan nang njero kerdus, di jupuk di lebokno sak klambi, "lumayan Kran, gae kenang2an" ujare Munali, weruh ngono Sokran yo melok2 njupuk terus dilebokno sak jaket.
